First International Merchant Bank (FIMBank) və Azərbaycan Rabitə Nazirliyinin işi üzrə Rotterdam məhkəməsində ilkin dinləmələrin tarixi müəyyən lunub. Azərbaycan Rabitə və İnformasiya Texnologiyaları Nazirliyinin kadrlar və hüquq şöbəsinin müdiri Bəxtiyar Məmmədovun Trend ə verdiyi məlumata görə, məhkəmədə şahid ifadələri dekabrın ikinci dekadasında dinləniləcək.
Bir qədər əvvəl bank, şahidlərin dinlənilməsinin Rotterdamın özündə keçirilməsinə təkid edərək, adları işdə hallandırılan 8 şahidin dindirilməsinin Azərbaycanda keçirilməsinə dair Rabitə Nazitrliyinin təklifi ilə razılaşmayıb.
Oktyabrın birinci dekadasında Paris məhkəməsi bu işlə bağlı Azərbaycan tərəfinin müraciətinə baxacaq. Məhz Paris məhkəməsinin qərarı ilə bankın iddiası əsasında Rabitə Nazirliyinin vəsaitlərinə - Azərbaycan tərəfinin Fransanın "Eutelsat S.A" şirkətinə yatırdığı 500 min səhmə və onların 1 mln. dollardan artıq dividentlərinə həbs qoyulub
Bu günlərdə Paris məhkəməsi bankın digər bir vəsadətini təmin edib. Məhkəmənin qərarı ilə bu vəsaitlər xüsusi hesabda girov olaraq saxlanılır. Bu isə o deməkdir ki, Paris məhkəsinin 6,5 mln. avro dəyərində qiymətləndirdiyi bu vəsaitlər məhkəmənin son qərarından sonra avtomatik olaraq xeyrinə son hökm çıxarılacaq tərəfin balansına keçəcək.
First International Merchant (FIM Bank) 2004-cü ilin iyulunda Azərbaycan hökumətinə qarşı iddia ilə çıxış edib. İddia guya Rabitə Nazirliyi və "Pochtbank" SKB-nin zəmanəti ilə Rabitə Nazirliyinin mövcud olmayan Aztell və Baktell müəssisələrinə müvafiq olaraq $3035000 və $1560000 məbləğində ayrılmış kreditlərin ödənilməməsi faktı üzrə qaldırılıb. Bu günə qədər məhkəmə çəkişməsi sənədlərin məhkəmədə baxılması üçün təqdim olunması yolu ilə davam edib. Azərbaycan adıçəkilən işdə hökumətin əli olmadığını təsdiqləyən bütün mümkün sənədləri hazırlayaraq, bu ilin yanvarında təqdim edib.
