Azərbaycan höküməti və Maltanın Fimbankı (First International Merchant Bank) işi üzrə Rotterdam məhkəməsinin növbəti iclasının bu ilin ikinci kvartalınadək keçiriləcəyi gözlənilir. Bu barədə Trend ə Azərbaycan rabitə və İnformasiya Texnologiyaları Nazirliyindən xəbər veriblər.
Nazirlik nümayəndəsinin sözlərinə görə, bu gün nazirliyə əvvəllər aprelə qədər keçiriləcəyi güman olunan iclasın iyuladək keçiriləcəyi barədə rəsmi məktub daxil olub.
2006-cı ilin dekabrında keçirilən əvvəlki məhkəmə iclasında Fİmbankın Kanadada yaşayan eks-prezidentinin ifadəsi dinlənilmişdi.
Növbəti iclasda bank tərəfindən ikinci şahid və ola bilər ki, hər iki tərəfin şifahi ifadəsi dinlənilsin.
"Dəqiq tarix hələlik tərəflər arasında razılaşdırılır" - deyə dövlət strukturundan bildiriblər.
Fimbank 2004-cü ildə guya Rabitə nazirliyinin və nazirliyin mövcud olmayan müəssisəsi Poçtbankın zəmanəti ilə verilmiş kreditlərin (Aztell 3035000 dollar və Baktell 1560000 dollar) ödənilməməsi ittihamı ilə Azərbaycan hökümətinə qarşı iddi qaldırıb.
Məlum məhkəmə istintaqında Azərbaycan artıq ilk uğura nail olub. Noyabrda nazirliyə Ali İnstansiyaların Paris Məhkəməsinin Azərbaycanın xeyrinə çıxardığı rəsmi qərarı daxil olub ki, buna əsasən FİMbank mənəvi ziyana görə 5 min avro məbləğində və məhkəmə prosedur məsələlərinə xərclənmiş məsrəflərə görə 900 avro məbləğində pul ödəməlidir.
