Gürcüstan, Tbilisi, 12 aprel /Trend, müxbir N.Kirsxaliya/
Gürcüstanın regionlarında daşqın gözlənilməsi ilə əlaqədar fövqəladə halllar üzrə xidmət idarələri tam hazırlığa gətirilib.
Təbiətin Mühafizəsi Nazirliyindən cümə axşamı Trend-ə bildiriblər ki, bu xidmət idarələri daşqınlar zamanı istənilən köməyi göstərməyə hazırdır və bütün zəruri avadanlıq və texnika ilə təchiz edilib.
Sinoptiklərin proqnozlarına əsasən, aprelin 12-dən Qərbi Gürcüstanın üç regionunda daşqın gözlənilir. Quriya, Acariya və İmeretidə leysan yağışları nəticəsində çaylarda suyun səviyyəsi kritik həddə çatıb, bu gün isə yağışlar daha intensiv olacaq.
Aprelin 13-də Gürcüstanın bütün ərazisində güclü yağışlar gözlənilir.
Hidrometereoloqlar bəyan edirlər ki, Gürcüstan dağlarında qarın tez əriməsi qəflətən 15-20 dərəcə istiliyin müşahidə edilməsi səbəbindən baş verib, yağıntılar isə vəziyyəti daha da mürəkkəbləşdirir.