Azərbaycan, Bakı, 25 oktyabr /Trend/
Oktyabrın 24-də Azərbaycanın ABŞ-dakı səfirliyinin və ABŞ diplomatlarını və onların ailə üzvlərini bir araya gətirən AAFSW (The Associates of the American Foreign Service Worldwide) təşkilatının birgə səyləri ilə Dövlət Departamentində təntənəli Azərbaycan mədəniyyəti günü keçirilib.
Tədbir Dövlət Departamentinin yüksək səviyyəli tədbirlərin keçirildiyi Din Açeson auditoriyasında olub.
Trend-in Azərbaycanın ABŞ-dakı səfirliyinə istinadən verdiyi məlumata görə, tədbirdə Dövlət Departamentinin nümayəndələri, ABŞ-da akkreditə olmuş səfirlər və digər diplomatlar, AAFSW təşkilatının, Amerika ictimaiyyətinin, habelə ABŞ-dakı Azərbaycan diasporunun çoxsaylı üzvləri iştirak ediblər.
Tədbiri giriş sözü ilə açan AAFSW təşkilatının prezidenti Patrisia Linderman və təşkilatın proqram rəhbəri Şeyla Svitzer Dövlət Departamentində Azərbaycan mədəniyyəti gününün keçirilməsinin zəngin Azərbaycan mədəniyyətinin ABŞ-da təbliği baxımından əhəmiyyətini vurğulayıb və belə tədbirlərin iki ölkə xalqlarını bir-birinə daha da yaxınlaşdırdığını qeyd edib.
Daha sonra çıxış edən səfir Elin Süleymanov Azərbaycan mədəniyyətinin xarakterik xüsusiyyətləri barədə iştirakçılara məlumat verib. O, Azərbaycan mədəniyyətinin müxtəlif qollarının inkişaf tendensiyasından ətraflı bəhs edərək, ümumiyyətlə, Azərbaycan mədəniyyətinin müxtəlif mədəni irsləri özündə əks etdirdiyini vurğulayıb. Eyni zamanda, səfir Heydər Əliyev Fondunun və Fondun prezidenti, Azərbaycanın birinci xanımı Mehriban Əliyevanın dünyada Azərbaycan mədəniyyətinin, o cümlədən Azərbaycanın ecazkar muğam musiqisinin tanınmasında müstəsna xidmətləri olduğunu qeyd edib.
Rəsmi çıxışlardan sonra tədbir Azərbaycan mədəniyyətinə aid elementlərin əyani olaraq nümayiş etdirilməsi ilə davam etdirilib. Belə ki, azərbaycanlı caz ustası, dahi bəstəkar Qara Qarayevin nəvəsi Zülfüqar Bağırovun və ABŞ-ın məşhur pianoçularından olan Harri Apelmanın səsləndirdiyi Azərbaycan caz nümunələri, eyni zamanda, ABŞ-da təhsil alan azərbaycanlı tələbə Şahin Ələkbərovun pianoda müşayiəti ilə ABŞ-da yaşayan azərbaycanlı gənc Nurlan Qasımovun oxuduğu "Ala gözlüm", "Bu gün ayın üçüdür" kimi Azərbaycan xalq mahnıları iştirakçıları heyran edib və Azərbaycan musiqinin müxtəlifliyini nümayiş etdirib. Əlavə olaraq, tədbirdə ifa olunan "Naz Eləmə" və "Turacı" rəqsləri izləyicilər tərəfindən böyük maraqla qarşılanıb.
Eyni zamanda, tədbir iştirakçıları üçün verilən ziyafətdə Azərbaycan milli mətbəxinin nümunələri təqdim olunub.
