Azərbaycan, Bakı/ Trend müxbir İ.Əlizadə/ Azərbaycanda qanunsuz fəaliyyət göstərən 40 aptekin sənədləri Səhiyyə Nazirliyi tərəfindən hüquq-mühafizə orqanlarına təqdim olunub və hazırda prokurorluq bu məsələni araşdırır. Bu barədə çərşənbə axşamı jurnalistlərə açıqlamasında səhiyyə naziri Oqtay Şirəliyev məlumat verib.
"Azərbaycanda qeyri-qanuni fəaliyyət göstərən 60 aptekdən 20-nin fəaliyyəti Səhiyyə Nazirliyi tərəfindən dayandırılıb. Qeyri-qanuni fəaliyyət göstərən 40 aptekin sənədləri isə araşdırılmaq üçün hüquq-mühafizə orqanlarına təqdim olunub" - deyə Şirəliyev bildirib.
Onun sözlərinə görə, son 4 ay ərzində Səhiyyə Nazirliyi tərəfindən 526 aptekdə yoxlamalar aparılıb. Yoxlamalar zamanı Səhiyyə Nazirliyinin laborator ekspertizasından keçməyən 5 min 700 növ dərman aşkar olunub: "Həmin dərmanlar heç dövlət gömrük orqanlarında da qeydiyyatdan keçməyib və onların Azərbaycana necə gətirildiyi məlum deyil. Eyni zamanda, 400 növ vaxtı keçmiş dərman aşkar edilərək Səhiyyə Nazirliyi tərəfindən müsadirə olunub".