Bakıda avtomobillərdən oğurluq edən dəstə zərərsizləşdirilib

Azərbaycan, Bakı, 04 aprel / Trend , müxbir K.Zərbalıyeva /

Bakı polisi avtomobillərdən oğurluq edən dəstə üzvlərini saxlayıb.

Bakı Şəhər Baş Polis İdarəsindən şənbə günü Trend -verilən məlumata görə, aparılmış əməliyyat tədbirləri zamanı müəyyən olunub ki, Cavadov Kamil Rəşid oğlu, Şirinzadə Elgün Mikayıl oğlu və Rəhimov Vahab Mirşücaət oğlunun ilk cinayəti "İnşaatçılar" metrostansiyası yaxınlığında olub.

Onlar "Jeep" markalı avtomobildən qabaq yan şüşəni sındırmaqla oğurluq ediblər.

Aprelin 3-də polis tərəfindən saxlanılan dəstə üzvlərinin 20-dək avtomobildən oğurluq etdiyi müəyyən olunub.

Aprelin 3-də Vahab Rəhimovun Yasamal rayonunda yaşadığı mənzilə baxış keçirilərkən 30 qram narkotik vasitə olan heroin, 3 ədəd pnevmatik tapança, 13 ədəd mobil telefon aparatı, 12 ədəd mobil telefon nömrəsi, 4 ədəd avtomobil maqnitafonu, 3 ədəd səsgücləndirici, 1 ədəd tranzit avtomobil nömrəsi və s. aşkar olunaraq götürülüb.

İlkin dindirmə zamanı şübhəli şəxs qismində saxlanılanlar aşkar olunmuş əşyaları müxtəlif yerlərdən oğurladıqlarını etiraf ediblər.

Hazırda istintaq davam etdirilir və onların digər cinayətlərdə iştirak edib-etməmələri müəyyənləşdirilir.