Azərbaycan, Bakı, 06 may /Trend, müxbir A.Hüseynbala/
Azərbaycanın müxalifət partiyasının rəhbəri deyib ki, namizədlərin müəyyənləşdirilməsi səlahiyyəti yerli təşkilatların ixtiyarına verilib.
"İndi hər bir rayon təşkilatımızda növbədənkənar qurultayla bağlı keçirilən konfranslarda həm də deputatlığa namizədlər müəyyənləşdirilir", - cümə axşamı Trend-ə Azərbaycan Liberal-Demokrat Partiyasının (ALDP) sədri Fuad Əiiyev bildirib.
Trend-in arayışı: Azərbaycanda Parlament seçkilərinin 2010-cu ilin payızında keçiriləcəyi gözlənilir. Bundanəvvəlki seçkilər 2005-ci ilin noyabr ayında keçirilib. Azərbaycanda Parlament seçkiləri majoritar sistem üzrə 125 seçki dairəsində keçirilir.
Əliyevin sözlərinə görə, həmin konfranslarda yerli təşkilatın üzvü olan 2-3 nəfərin deputatlığa namizədliyi məsələsi müzakirə olunur. "Müzakirələr nəticəsində onların arasında kim daha çox şanslı hesab olunursa, onun namizəd irəli sürülməsi ilə bağlı qərar verilir. Yerli təşkilatların konfranslarında artıq 22 nəfərin namizədliyi dəqiqləşdirilib", - partiya sədri əlavə edib.
ALDP sədri deyib ki, oktyabrın birinci ongünlüyünə nəzərdə tutulan növbədənkənar qurultayın keçirilməsində əsas məqsəd Parlament seçkiləri ilə bağlı olacaq. "Həmin vaxt bütün müxalifət partiyalarının deputatlığa namizədləri bəlli olacaq. Biz qurultayda öz namizədlərimizlə digər partiyaların namizədlərinin şansları ilə bağlı ümumi müzakirə aparacağıq. Əgər eyni dairədən namizədliyini irəli sürən başqa partiyanın üzvünün şansı daha çox olacaqsa, onda biz qurultayda öz üzvümüzün namizədliyini geri götürməsi haqda qərar qəbul edəcəyik. Biz istəyirik, seçkilərdə müxalifət Parlamentdə maksimum deputat mandatı qazansın", - Əliyev vurğulayıb.
АLDP 1999-cu ildə yaradılıb. 2000-ci ildə partiyanın sədri Zakir Məmmədov vəfat etdikdən sonra, 2001-ci ildə ALDP ikiyə bölünüb. Valeh İbadov və Fuad Əliyev - hər ikisi ALDP adına iddia ediblər. 2004-cü ildə Ali Məhkəmənin qərarı ilə Fuad Əliyevin rəhbərlik etdiyi partiya ALDP kimi tanınıb və dövlət qeydiyyatından keçib.