Bakı. Trend:
İran prezidenti İbrahim Rəisi bu gün Tehranda Asiya və Sakit Okean Ölkələri Xəbər Agentlikləri Təşkilatının (OANA) 18-ci Baş Assambleyasında iştirak edən informasiya agentliklərinin rəhbərləri və rəsmi şəxsləri ilə görüşüb.
Trend-in məlumatına görə, görüş zamanı çıxış edən İ.Rəisi İranın beynəlxalq əməkdaşlığın genişləndirilməsi üzrə səyləri barədə danışıb, müasir dünyada KİV-lərin rolunu qeyd edib.
İran prezidenti dezinformasiya və feyk xəbərlərə qarşı mübarizənin vacibliyini vurğulayıb, assambleya iştirakçılarına uğurlar arzulayıb.
İştirakçılar qonaqpərvərliyə görə İran prezidentinə təşəkkür edib.
4 gün davam edəcək sammitdə 20-dən çox ölkədən böyük informasiya agentliklərinin nümayəndələri, eləcə də bir sıra beynəlxalq təşkilatların rəhbərləri iştirak edir. Sammitdə həmçinin Trend BİA-nın baş redaktoru Emin Əliyev iştirak edir.
OANA 1961-ci ildə UNESCO-nun təşəbbüsü ilə yaradılıb. Hazırda təşkilata Asiya və Sakit Okean regionunun 33 ölkəsindən 44 agentlik daxildir.
(Tərcümə: Orxan Nəbiyev)