Azərbaycan, Bakı, 04 mart / Trend , müxbir A.Salmanov/ Sabiq iqtisadi inkişaf naziri və qardaşı, "Azpetrol" Şirkətlər Qrupunun sabiq prezidentinin apellyasiya şikayətinə martın 18-də baxılacaq. Bu haqda Trend ə Bakı Apellyasiya Məhkəməsindən məlumat verilib.
Apellyasiya şikayətində sabiq nazir və qardaşı barələrində bəraət hökmü çıxarılmasını xahiş ediblər.
Məhkəmənin hökmü ilə 10 il müddətinə azadlıqdan məhrum edilmiş Fərhad Əliyev 2005-ci ilin oktyabrında dövlət çevrilişinə cəhd ittihamı ilə həbs edilib və sonradan ona qarşı iqtisadi cinayətlərdə iştirakı ilə bağlı ittiham irəli sürülüb.
Məhkəmə hökmündə qeyd olunub ki, Əliyev cinayətləri 1999-cu ilin dekabrından 2005-ci ilin oktyabrınadək müddətdə törədib. O, vəzifədə olduğu müddətdə qohumlarından, tabeçiliyində olan məmurlardan ibarət mütəşəkkil cinayətkar dəstə yaradaraq, bu dəstənin törədəcəyi cinayətlərin planlarının əvvəlcədən işlənib hazırlanmasına, ayrı-ayrı növ korrupsiya cinayətlərə cəlb edərək dəstə üzvlərinin dairəsinin müəyyən edilməsinə və cinayətlərin törədilməsinə şəxsən rəhbərlik edib. Əliyev Ali Məhkəmə və Apelyasiya Məhkəməsinin balansında olan iri qeyri-yaşayış sahəsi, "İçərişəhər" Tarixi Memarlıq Qoruğunun balansındakı qeyri-yaşayış sahələrini, "Cənubsənayetikinti"nin yarımçıq tikilisini, 94 saylı İdman Mədəni Mallar mağazasını, "Qafqaz ticarət evi", "Azərtac" Azərbaycan Dövlət Teleqraf Agentliyinin balansında olan qeyri-yaşayış sahəsini, Standartlaşdırma, Metrologiya və Patent üzrə Dövlət Agentliyinin elmi-texniki kitabxanasını, Gəncə Xalça Kombinatına məxsus sahəni özəlləşdirərək ələ keçirib. Cinayət işi üzrə 1287 zərərçəkmiş, 700-ə yaxın şahid, 164 mülki iddiaçı var.
Məhkəmənin hökmü ilə əmlakı müsadirə olunmaqla Əliyev 10 il, onun qardaşı Rafiq Əliyev isə 9 il azadlıqdan məhrum edilib. Həmçinin məhkəmə Fərhad və Rafiq Əliyev qardaşlarının həbsdən azad olunduqdan sonra 5 il müddətinə dövlət vəzifəsi tutmalarını qadağan edən qərar çıxarıb. Digər təqsirləndirilənlər Maarif Qurbanov 7 il 6 ay, Mirməcid Əhmədov 5 il, Əlixan Paşayev isə 4 il müddətinə azadlıqdan məhrum ediliblər. Məhkəmənin hökmü ilə digər təqsirləndirilən şəxslər Çingiz İbadov, Rafiq Abbasov, Məhəmmədnəbi Rüstəmov, Sakit Baxışov 7 il 6 ay, Mirsalam Əhmədov, Elçin Nadirov, Qədir Hüseynov 6 il, Ədalət Dadaşov 3 il (1 il sınaq müddəti olmaqla), Yusif Həmidov, İsmayıl Mənsimov 2 il, Ağa-Əli Əhmədov 2 il (6 ay sınaq olmaqla), Sergey Borşevski 2 il (1 il sınaq olmaqla), F. Əliyevin sabiq köməkçisi Elşad Abbasov və Ağabəy Hüseynov 1 il şərti olaraq azadlıqdan məhrum edilib və məhkəmə zalından azadlığa buraxılıblar.
