Bakı. Çingiz Səfərli - Trend:
Azərbaycan Respublikasının Dövlət Dil Komissiyası yanında Monitorinq Mərkəzinin təşkilatçılığı ilə Dünya Azərbaycanlılarının Həmrəyliyi Gününə həsr olunmuş "Dilimizə sevgi ilə yola çıxdıq" adlı beynəlxalq tədbir keçirilib.
Trend-in məlumatına görə, Azərbaycan Respublikasının dövlət dili olan Azərbaycan dilinin qorunması, onun beynəlxalq aləmdə rolu və nüfuzunun yüksəldilməsi, dünya miqyasında tanıdılması ilə bağlı təşkil olunan tədbirdə Mərkəzin əməkdaşları və dünyanın 30-a yaxın (Türkiyə, Amerika Birləşmiş Ştatları, Kanada, İngiltərə, İtaliya, İsveçrə, Misir, Çin, Niderland, Almaniya, Belçika, Polşa, Fransa və s.) ölkəsində yaşayan və müxtəlif qurumlarda çalışan 40-dan çox azərbaycanlı iştirak edib.
Tədbiri giriş sözü ilə açan Monitorinq Mərkəzinin direktoru professor Sevinc Əliyeva Dünya Azərbaycanlılarının Həmrəyliyi Günü münasibətilə xaricdə yaşayan soydaşlarımızı ürəkdən təbrik edərək bu əlamətdar günün tarixindən bəhs edib. O, milli birlik, Azərbaycana məhəbbət, milli-mənəvi dəyərlərimizə hörmət, vətənə bağlılıq hisslərini özündə təcəssüm etdirən bu günün qeyd olunmasının ulu öndər Heydər Əliyevin adı ilə bağlı olduğunu vurğulayıb. Sonra ümummilli liderin vaxtilə dünya azərbaycanlılarına etdiyi müraciət səsləndirilib. Daha sonra Sevinc Əliyeva Monitorinq Mərkəzinin fəaliyyəti və ölkə başçısının dövlət dilinə olan qayğısından ətraflı bəhs edib. Natiq qeyd edib ki, dil siyasətinin formalaşdırılmasında, ana dilinin dövlət dili statusunun yüksək səviyyədə təmin edilməsində Azərbaycan xalqının ümummilli lideri Heydər Əliyevin böyük xidmətləri olub. Ulu öndərin dil siyasəti bu gün də Prezident İlham Əliyev tərəfindən uğurla davam etdirilməkdədir.
Tədbir zamanı Misirdə Azərbaycan Diaspor Təşkilatları Birliyinin və Misir – Azərbaycan Dostluq Cəmiyyətinin sədri və həmtəsisçisi Seymur Nəsirov çıxış edərək yaşadığı ölkədə Azərbaycan dilinə böyük marağın olduğunu bildirib və mindən çox əcnəbi tələbənin bu dili öyrənməsindən bəhs edib. Tədris prosesini daha da təkmilləşdirmək üçün natiq müxtəlif təkliflər də irəli sürüb, eləcə də "Əcnəbilər üçün Azərbaycan dili" proqramlarının hazırlanmasının zəruriliyini, danışıq mühitinin yaradılmasının, eləcə də səviyyələr üzrə xüsusi dərsliklərin nəşr olunmasının vacibliyini qeyd edib. Əcnəbi tələbələrin ədəbiyyatla təmin olunması sahəsindəki çətinliklərin mövcud olması da diqqətə çatdırılıb. Tədbirə Çin Xalq Respublikasından qoşulan Pekin Xarici Dillər Universitetinin Asiya – Afrika fakültəsinin Azərbaycan dili kafedrasının yaradıcısı Aqşin Əliyev bildirib ki, hazırda çalışdığı fakültədə 30-a yaxın fənn tədris olunur və bu, əcnəbilər üçün nəzərdə tutulmuş Azərbaycan dili üzrə ilk ixtisaslaşmış fakültədir. Aqşin Əliyev ölkə xaricində Azərbaycan dilinin tədrisi üçün nəzərdə tutulmuş dərsliklərin keyfiyyəti ilə bağlı iradlarını da dilə gətirib. Təklif edilib ki, məhz əcnəbi tələbələr üçün təhsil mərhələlərinə uyğun olaraq proqram və dərsliklər hazırlansın.
Çıxış edən Amerika Azərbaycanlılarının Koordinasiya Şurasının İdarə Heyətinin üzvü, Amerika – Azərbaycan İnteqrasiya Mərkəzinin rəhbəri Samir Novruzov Amerika məktəblərində Azərbaycan dilinin tədris olunması üçün layihə təklif edildiyini və bu mövzu ilə bağlı ingilislərə məxsus metodologiyanın işlənib hazırlandığını diqqətə çatdırıb. Digər çıxışlarda Azərbaycan dilinin beynəlxalq aləmdə nüfuzunu artırmaq, təbliği və tədrisini təmin etmək məqsədilə bəzi ölkələrdə həftəsonu məktəblərinin olması, Niderlandda "Milli dərs" layihəsinin həyata keçirilməsi, eləcə də Bolqarıstanda Azərbaycan ədəbiyyatı nümunələrinin bolqar dilinə tərcümə edilməsi və Avropada Şuşa haqqında kitabın işıq üzü görməsi haqda məlumat verilib.
Tədbir ölkə xaricində Azərbaycan dilinin təbliği, tədrisi, eləcə də Azərbaycan dilini öyrənmək istəyən əcnəbi tələbələrin ehtiyacları ilə bağlı problemlərin müzakirəsi ilə davam edib. Çıxışlarda Azərbaycan dilinin ölkə xaricində və əcnəbi tələbələrə tədrisində yaranan çətinliklər, resurs və dərsliklərin bəzən qənaətbəxş olmaması, lazımi ədəbiyyatın çatışmazlığı fikirləri səsləndirilib, hüquqi sənədlərdə tərcümə probleminin mövcudluğu xüsusilə vurğulanıb
Aparılan müzakirələrin yekunu olaraq xaricdəki mərkəzlərin, cəmiyyətlərin fəaliyyətləri yaxından öyrənilib, ana dilinin beynəlxalq aləmdə tətbiqi ilə bağlı mövcud problemlər, eləcə də Azərbaycan dilinin dünya miqyasında nüfuzunun yüksəldilməsi və tətbiqi istiqamətində görüləcək konkret tədbirlər müəyyənləşdirilib.