Bakı. Trend:
Azərbaycan Memarlıq və İnşaat Universiteti (AzMİU) Tələbə Gənclər Təşkilatının (TGT) təşkilatçılığı, Azərbaycan Tələbə Gənclər Təşkilatları İttifaqının (ATGTİ) dəstəyi və Qərbi Azərbaycan İcmasının təşəbbüsü ilə “Qərbi Azərbaycan müzakirəsi: MUN Simulyasiya Konfransı” keçirilib.
BMT Baş Assambleyası modelinin simulyasiya konfransı Qərbi Azərbaycanla bağlı beynəlxalq problemləri və həll yollarını müzakirə etmək, gənclərin diplomatik bacarıqlarını inkişaf etdirmək və onların bu mövzuda məlumatlılığını artırmaq məqsədi daşıyıb.
Konfransın ilk günü açılış mərasimi baş tutub. Dövlət Himni səsləndirilib və ölkəmizin bütövlüyü uğrunda canını fəda edən şəhidlərin xatirəsi bir dəqiqəlik sükutla yad edilib.
Açılışda çıxış edən rektoru professor Gülçöhrə Məmmədova tədbirin əhəmiyyətindən bəhs edib. Rektor gənclərin bu cür təşəbbüslərlə çıxış etməsini yüksək qiymətləndirib və onların beynəlxalq proseslərə bələd olmalarının, analitik düşüncə qabiliyyətlərinin inkişaf etdirilməsinin vacibliyini vurğulayıb. Rektor söyləyib ki, tələbələrin belə simulyasiya konfranslarında iştirakı gələcək peşəkar fəaliyyətləri üçün mühüm bir pillədir və bu platformalar gənclərin həm vətənpərvərlik ruhunun güclənməsinə, həm də dünyagörüşlərinin genişlənməsinə istiqamət verir.
Qərbi Azərbaycan İcmasının Aparat rəhbəri Qalib Qasımov isə
Qərbi Azərbaycan məsələsinin tarixi və hüquqi aspektlərinə
toxunaraq, bu kimi simulyasiya konfranslarının gənclərin milli
məsələlərə olan diqqətini artırmaq baxımından xüsusi əhəmiyyət
daşıdığını bildirib. O, vurğulayıb ki, Qərbi Azərbaycandan məcburi
köçkün düşmüş soydaşlarımızın hüquqlarının müdafiəsi və onların
dinc yolla, könüllü və təhlükəsiz şəkildə geri qayıdışının təmin
olunması beynəlxalq hüquqa əsaslanan ədalətli bir tələbdir. Qalib
Qasımov bu təşəbbüsün gənclər tərəfindən gündəmə gətirilməsini
təqdirəlayiq hal kimi dəyərləndirib və bu istiqamətdə
maarifləndirici tədbirlərin davamlı olmasının vacibliyini qeyd
edib.
Daha sonra Azərbaycan Tələbə Gənclər Təşkilatları İttifaqının
(ATGTİ) sədri Rəşad Zeynalov gənclərin ictimai fəallığının və
təşəbbüskarlığının vacibliyinə diqqət çəkərək bu cür tədbirlərin
tələbələrin intelektual inkişafına, analitik düşüncə və diplomatik
bacarıqlarının formalaşmasına mühüm töhfə verdiyini bildirib. O,
qeyd edib ki, MUN formatlı simulyasiya konfransları gənclərin
qlobal problemlərə yerli baxış bucağından yanaşmasını, milli
məsələləri beynəlxalq kontekstdə müzakirə etməyi öyrənmələri
baxımından olduqca faydalıdır. Rəşad Zeynalov bu təşəbbüsə görə
təşkilatçılara təşəkkürünü bildirərək ATGTİ-nin hər zaman gənclərin
inkişafına yönəlmiş bu kimi layihələri dəstəkləməyə davam edəcəyini
vurğulayıb.
Konfrans plenar sessiyalar formasında davam edib. BMT Baş Assambleyasının iclasında müxtəlif üzv dövlətlərin nümayəndələri rolunu icra edən tələbə-gənclər Qərbi Azərbaycandan məcburi köçkünlərin qayıdış prosesi, onların mədəni, iqtisadi və sosial hüquqlarının bərpası üzrə müzakirələr aparıblar.
Azərbaycan və ingilis dillərində keçirilən müzakirələrə ümumilikdə 50 nəfər tələbə qatılıb.
2 gün davam edən simulyasiyada iştirakçılar gərgin diplomatik mübarizə apararaq öz mövqelərini ortaya qoyub, mövzu ilə bağlı müxtəlif təkliflər səsləndiriblər. Son gün isə qoyulan məsələnin həll yolunu birlikdə müzakirə edərək yekun qətnamə qəbul ediblər.