Azərbaycan, Bakı, 15 iyul/ Trend , müxbir İ.Xəlilova/ Küveyt Maliyyə Evi (Kuwait Finance House) və "Azərbaycan İnvestisiya Şirkəti" (AİŞ) ASC başa çatma mərhələsində olan səhmdar müqavilənin hazırlanmasından sonra birgə sərmayə strukturunu qeydiyyatdan keçirəcəklər. Bu barədə çərşənbə axşamı AİŞ-in icraçı direktoru Anar Axundov məlumat verib. Bu məsələnin həlli üçün KFH ekspertlərinin iyulun sonunadək Azərbaycana səfəri gözlənilir.
"Beynəlxalq hüquqi şirkətin hazırlanmasına cəlb edildiyi müqavilənin imzalanmasından sonra o, fəaliyyətə başlaya bilər", - Axundov bildirib.
İyulun sonunda-avqustun əvvəlində birgə investisiya şirkətinin təsisi məsələsi AİŞ Müşahidə Şurasının müzakirəsinə çıxarılacaq.
Birinci iki il ərzində $20 mln. məbləğində formalaşdırılacaq. AİŞ-in iştirak payı isə $5 mln. təşkil edəcək. Qalan vəsait isə Küveyt Evi tərəfindən yatırılacaq.
Bununla yanaşı, KFH ilə layihələr üzrə iş aparılır. İslam strukturları daim kənd təsərrüfatı, infrastruktur, loqistika, nəqliyyat sahələrindəki layihələrdə maraqlı olublar. Bununla əlaqədar, Küveyt Maliyyə Evi ilə daha çox bu istiqamətlərdə işləmək planlaşdırılır.
AİŞ layihələrdə minoritar səhmdar kimi çıxış etmək niyyətindədir. Azərbaycana əsas kapital isə, əcnəbi sərmayədardan gələcək. AİŞ və KFH arasında birgə Fondun 2007-ci ilin mayında imzalanan Niyyət Memorandumu əsasında yaradılması nəzərdə tutulur. Bu Fond vasitəsilə Azərbaycanda birgə investisiya layihələri reallaşdırılacaq.
Razılaşmaya əsasən, AİŞ yeni təşkilatın səhmlərinin 25, KFH isə 75 faizini almağı planlaşdırır. Memorandumda nəzərdə tutulan tədbirlərin həyata keçirilməsi nəticəsində, Azərbaycanda investisiya iqlimin inkişafı və daha çox biznes-layihələrin reallaşdırılması üçün şərait yaradılacaq.
İyulun 15-nə olan cari məzənnə - 0,8051 AZN/USD
Müəlliflə əlaqə saxlamaq üçün elektron ünvan: [email protected]
