Azərbaycan, Bakı, 18 avqust/ Trend , müxbir S.Babayeva/ Azərbaycanın Standartlaşdırma, Metrologiya və Patent üzrə Dövlət Agentliyi idarəetmə sistemlərinin yaradılması üzrə konsaltinq fəaliyyəti göstərən təşkilatların milli sertifikatlaşdırma sistemində - AZS-də qeydiyyatı üzrə təlimatları təsdiqləyib.
Agentliyin verdiyi məlumata görə, qeydiyyatın məqsədi normativ sənədlərin (AZS İSO 9001, AZS CTB 18001,İSO 14001,İSO 22000 və s.) tələblərinə uyğun idarəetmə sistemlərinin işlənməsi, tədbiqi və sertifikatlaşdırmasına hazırlıq üzrə göstərilən xidmətlərin keyfiyyətinə zəmanəti təmin etməkdir.
Agentlik bildirir ki, konsaltinq fəaliyyətinin həyata keçirilməsinə səriştəliliyini təsdiq edən, şəhadətnaməyə malik və AZS Milli Sertifikatlaşdırma sisteminin Reyestrində qeydiyyata alınmış təşkilatlar konsaltinq fəaliyyətini həyata keçirə bilərlər.
Azərbaycanın Standartlaşdırma, Metrologiya və Patent üzrə Dövlət Agentliyi ölkə prezidentinin 2001- ci il dekabr fərmanı ilə yaradılıb. İdarə standartlaşdırma, metrologiya, sertifikatlaşdırma və sənaye mülkiyyəti obyektlərinin mühafizəsi sahəsində dövlət siyasətini formalaşdıran və həyata keçirən mərkəzi icra hakimiyyəti orqanıdır.
