Azərbaycan, Bakı, 27 sentyabr / Trend , müxbirlər İ.Əlizadə, Ü.İsmayılova/ " Vətəndaşların SSRİ dövründə banklarda qalan əmanətlərinin qaytarılmasında əsas problem, banklarda qalan əmanətlərlə bağlı sənədlərin bir hissəsinin itməsindədir", - deyə şənbə günü parlamentdə keçirilən mətbuat konfransında Milli Məclisin Aparatının sədri Səfa Mirzəyev bildirib.
"Həmin sənədlərin bərpa olunması əmanətlərin qaytarılması prosesinə başlamaq üçün vacibdir", - o qeyd edib.
Əmanətlərin əhaliyə qaytarılması ilə bağlı ikinci problem, sovet dövründə Azərbaycanda yaşayan və hazırda digər ölkələrə daimi yaşayış üçün mühacirət etmiş şəxslərlə bağlıdır.
Parlament Aparatının sədri deyib ki, əmanətlərin qaytarılması ilə bağlı Qanunun hazırlanmasına təkcə parlamentin İqtisadi siyasət komissiyası deyil, həm də məsələyə aidiyyatı olan bütün dövlət orqanları cəlb olunub.
Əvvəllər Azərbaycanın maliyyə naziri Samir Şərifovun dediyinə görə, hazırda nazirlik əhaliyə SSRİ dövründə banklarda qalan əmanətlərin qaytarılması üzrə mexanizmi görmür.
"Əmanətləriin qaytarılması ilə bağlı olan məsələlərin çoxu hələ də açıq qalıb. Hazırda əmanətlərin qaytarılmasını nəzərdə tutan qanun layihəsi və onun aparılması mexanizmi yoxdur", - Şərifov deyib.
Nazirin sözlərinə görə, əmanətlərin qaytarılması üçün bir neçə amili, xüsusilə də əmanətlərin 10 il ərzində qaytarılmasının nə dərəcədə məqsədəuyğun olmasını və inflyasiyanı hansı vasitə ilə n tənzimlənməsini nəzərə almaq lazımdır.
Maliyyə Nazirliyinin rəhbəri onu da bildirib ki, əmanətlərin qaytarılmasında kütləvi qanun pozuntularına gətirib çıxara biləcək çoxlu problemlər var. "Əmanətçi kitabçalarının heç bir müdafiə dərəcəsi yoxdur. Bununla əlaqədar olaraq, onaların həqiqiliyi ilə bağlı xeyli əngəl yaranacaq", - o əlavə edib.
Kapital Bank - da aparılmış inventarlaşmanın gedişində 1 mln. 986 min əmanətçi müəyyən edilib. Onların əmanətlərinin ümumi məbləği 4,8 milyard Sovet rubludur. Maliyyə nazirliyi əmanətlərin qaytarılması üzrə üç variant hazırlayıb ki, bu da $ 0,3-0,4 milyard, $ 0,5 - 0,55 milyard və $ 0,8 -1 milyard tələb edir.
