Azərbaycan, Bakı, 19 noyabr/ Trend , müxbir E.İsmayılov/ Yenidən qurulan "İçəri Şəhər" metro stansiyası dekabrın 24 - də istismara veriləcək, - Bakı Metropolitenindən çərşənbə günü bildiriblər.
Əvvəllər yeni metro stansiyasının noyabrda istismara veriləcəyi planlaşdırılırdı. Lakin Gürcüstanın Poti limanının qeyri - sabit işləməsi ilə əlaqədar (Gürcüstanda münaqişə səbəbindən) şüşə gümbəz və yeni ventilyasiya sistemi Bakıya yubanma ilə gəlib. Stansiya üçün yük Odessadan göndərilib. Məhz bu səbəbdən stansiya azacıq gecikmə ilə istismara veriləcək, - mənbə əvvəllər bildirib.
Metal konstruksiya, şüşə və ventilyasiya sistemləri metropolitenin elan etdiyi tenderdə qalib olmuş İsrailin "Houri" şirkətinin istehsalıdır, - mənbə əvvəllər bildirib.
Əvvəllər "İçəri Şəhər" metro stansiyası yenidənqurma və bərpa işləri üçün bağlanılıb. Hazırda stansiyada əsaslı təmir işləri aparılır, xarici dəmir - beton konstruksiya şəffaf şüşə piramida ilə əvəzlənəcək. Dəmir - beton konstruksiyanın şüşəylə əvəzlənməsi Köhnə şəhərin qala divarlarının yaxşı görünməsi məqsədi daşıyır.
Bakı metropoliteni İçəri Şəhər stansiyasından Nəriman Nərimanov stansiyasınadək üç aralıq stansiya ilə 1967-ci ildən fəaliyyət göstərir. Metropolitenin yeddi stansiyası (Içəri Şəhər, Sahil, 28 May, Cəfər Cabbarlı, Xətai, Nizami, Elmlər Akademiyası) dərin enişli, Bakmil - yerüstü, qalanları isə sütunlu, dayaz enişlidir (cəmi 21 stansiya).
Müəlliflə əlaqə saxlamaq üçün elektron ünvan: [email protected]
