...

Maliyyə Monitorinqi Xidməti və Azərbaycan Auditorlar Palatası sıx əməkdaşlığa yönəliblər

Biznes və iqtisadiyyat xəbərləri Materials 12 Noyabr 2010 16:10 (UTC +04:00)

Azərbaycan, Bakı, 12 noyabr /Trend, müxbir N.İsmayılova/

Azərbaycan Auditorlar Palatası ölkənin Mərkəzi Bankı yanında Maliyyə Monitorinqi Xidməti ilə birlikdə auditor şirkətləri üçün "Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında" qanunla əlaqədar "Auditor şirkətlərinin öhdəlikləri" mövzusunda seminar keçirib.

Xidmətin şöbə müdiri Toğrul Musayevin sözlərinə görə, qurum Auditorlar Palatası ilə sıx əməkdaşlığa yönəlib, bu, qanunvericilik bazasının təkmilləşdirilməsi sahəsində əməkdaşlığı da nəzərdə tutur.

"Bütün dövlət qurumlarının əməkdaşlığı sayəsində böyük iş görülüb. Bunun nəticəsi kimi Azərbaycanın FATF-ın "xüsusi diqqət tələb edən" ölkələrin siyahısından çıxarılması olub. Bununla əlaqədar ölkənin bu sahədə islahatlar apamaq imkanı xeyli artıb", - Musayev bildirib.

Seminar çərçivəsində "Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında" qanuna əsasən, Auditorlar Palatası tərəfindən auditorların öz vəzifələrini yerinə yetirmələrinə nəzarətin təşkili məqsədilə hazırlanan metodiki göstərişlərin müzakirəsi aparılıb.

Oktyabrın 18-22-də Parisdə İqtisadi Əməkdaşlıq və İnkişaf Təşkilatının Maliyyə Tədbirləri üzrə İşçi Qrupunun (FATF) plenar iclasında Azərbaycanın "xüsusi diqqət tələb edən" ölkələrin siyahısından çıxarılması barədə qərar qəbul edilib.

Azərbaycanın cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə sahəsində gördüyü tədbirlər 2010-cu ilin iyununda FATF tərəfindən yüksək qiymətləndirilib. Bu iclasda Azərbaycanın FATF-ın siyahısından çıxarılması ilə bağlı müvafiq prosedurlara başlamaq haqqında qərar qəbul edilib. Qeyd edək ki, 25 ölkə arasında bu qərar yalnız Azərbaycan və Qətərə şamil edilib.

İqtisadi Əməkdaşlıq və İnkişaf Təşkilatının Maliyyə Tədbirləri üzrə İşçi Qrupu (FATF) cinayət gəlirlərinin "əldə edilməsi" və terrorizmin maliyyələşməsi ilə mübarizədə kollektiv tədbirlərin hazırlanması və həyata keçirilməsi üçün yaradılan hökumətlərarası təşkilatdır. FATF 1989-cu ildə Parisdə keçirilən "Böyük səkkizlik" sammitinin qərarına uyğun olaraq yaradılıb.

Hazırda FATF-a 34 iştirakçı daxildir. FATF 1990-cı ildə pul vəsaitlərinin yuyulması ilə mübarizə aparmaq üçün 40 tövsiyə hazırlayıb. 1996 və 2003-cü illərdə pulların yuyulması texnologiyasının inkişaf etməsi ilə əlaqədar onlara yenidən baxılıb. Bundan başqa, FATF 2001-ci ildə terrorizmin maliyyələşdirilməsi ilə mübarizə üzrə doqquz xüsusi tövsiyə də hazırlayıb. O, 2004-cü ilin oktyabrında dünyada dəyişmiş siyasi vəziyyətə uyğunlaşdırılıb. Bu sənədlər pulların silinməsi və terrorizmin maliyyələşdirilməsinin qarşısının alınması üzrə beynəlxalq standartlar kimi qəbul edilib.

Xəbər lenti

Xəbər lenti