Azərbaycan, Bakı, 20 avqust /Trend, müxbir A.Axundov/
"Yaşıl kart" nəqliyyat vasitələrinin sahiblərinin vətəndaş məsuliyyəti sığortasının beynəlxalq sisteminə qoşulmasının hüquqi əsasının yaradılması üçün İcbari Sığorta Bürosu ölkənin "İcbari sığorta haqqında" qanununa kompleks dəyişikliklərin ilkin layihəsini hazırlayıb. Bu barədə bürodan Trend-ə daxil olan məlumatda bildirilir.
Dəyişikliklər beynəlxalq normativ aktların, habelə Büro Şurasının tələblərindən, həmçinin "yaşıl kart" sisteminin iş xüsusiyyətindən və beynəlxalq təcrübədən irəli gələrək hazırlanıb. İcbari Sığorta Bürosundan bildirdilər ki, dəyişikliklər layihəsi baxılması üçün Maliyyə Nazirliyinə göndərilib.
Qanun qəbul edildikdən sonra Büronun Nizamnaməsinə müvafiq dəyişikliklərin edilməsi nəzərdə tutulur.
Bürodan bildirilib: "Digər tərəfdən, "Yaşıl kart" sisteminin fəaliyyətinin təmin edilməsi üçün çoxsaylı digər sənədlərin qəbul edilməsi zəruridir. Belə sənədlərə nümunə olaraq, sığorta şirkətləri tərəfindən tətbiq ediləcək "Yaşıl kart" tariflərinin və blank formasının təsdiqinə dair sənədləri, sistem üzrə sığorta və zərərlərin tənzimlənməsi qaydalarını, habelə sistem üzrə fəaliyyət göstərəcək sığorta şirkətlərinin statusu, onlara qarşı tələblərin müəyyən edilməsinə dair qaydaları, sistemdə fəaliyyətlə əlaqədar zəruri ehtiyatların formalaşdırılması ilə bağlı qaydaları və s. sənədləri göstərmək olar. Hazırda bu istiqamətdə zəruri işlər həyata keçirilməkdədir".
Daha əvvəl bürodan bildirilib ki, Azərbaycan iki il ərzində - 2014-2015-ci illərdə "Yaşıl kart"a qoşula biləcək.
