Azərbaycan, Bakı, 5 may /Trend, müxbir E.Əliyev/
2014-cü ilin I rübündə Azərbaycanın dövlət büdcəsinin mədaxil hissəsinə faktiki daxilolmalar ötən ilin eyni dövrü ilə müqayisədə 4 faiz azalaraq 4482,5 milyon manat (ÜDM-in 34,1 faizi) təşkil edib. Bu barədə Trend-ə ölkə hökumətindən məlumat verilib.
Dövlət büdcəsinin xərcləri 3,1 faiz azalaraq 4374,3 milyon manat (ÜDM-in 33,3 faizi) təşkil edib. Dövlət büdcəsinin kəsiri cari ilin I rübündə 49,5 milyon manat, yaxud ÜDM-in 0,6 faizini təşkil edib. I rübdə dövlət büdcəsinin kəsiri 154,6 milyon manat olub.
Vergilər Nazirliyinin xətti ilə dövlət büdcəsinə daxilolmalar 39,3 faiz (1762,9 milyon manat) təşkil edib. Gömrük rüsumları və vergilərdən daxilolmalar 330,4 milyon manat (7,4 faiz xüsusi çəki ilə) təşkil edib, digər mənbələr hesabına isə daxilolmalar 2389,2 milyon manat (53,3 faiz) olub. Ötən ilin I rübünə nisbətən vergi yığımları 15,7 faiz, gömrük daxilolmaları 14,1 faiz artıb, digər mənbələrdən daxilolmalar isə 16,4 faiz azalıb.
Hesabat dövrü ərzində ƏDV-dən 719,5 milyon manat gəlir daxil olub ki, bu da ümumi gəlirin 16,1 faizini təşkil edir. Gəlir vergisi 556 milyon manat (12,4 faiz), mənfəət vergisi 227,3 milyon manat (5,1 faiz), aksiz vergisi 224,5 milyon manat (5 faiz), əmlak vergisi 34,9 milyon manat (0,8 faiz), torpaq vergisi 11,3 milyon manat (0,3 faiz), yeraltı sərvətlər vergisi 31,6 milyon manat (0,7 faiz), xarici iqtisadi fəaliyyətə görə vergi isə 167,8 milyon manat (3,7 faiz) təşkil edib.
Əhalinin sosial müdafiəsi və təminatına dövlət büdcəsindən 518,5 milyon manat (11,8 faizlik xüsusi çəki) xərclənib. Təhsilə 274,1 milyon manat (6,3 faiz), səhiyyəyə 110,7 milyon manat (2,5 faiz), prokurorluq, təhlükəsizlik, hüquq-mühafizə orqanlarının saxlanılmasına 206,7 milyon manat (4,7 faiz), iqtisadiyyata investisiya qoyuluşuna isə 2343 milyon manat (53,6 faiz) xərclənib.
Dövlət xərclərinin 21,2 faizi (925,2 milyon manat) əməkhaqqılar, pensiyalar və maddi yardımın ödənilməsinə sərf edilib.
2014-cü ilin dövlət büdcəsinin gəlirləri 18,384 milyard manat, xərcləri isə 20,063 milyard manat səviyyəsində nəzərdə tutulur.