...

Venesiya Komissiyası "Sərbəst toplaşmaq azadlığı haqqında" qanun barəsində rəyini açıqlayıb

Biznes və iqtisadiyyat xəbərləri Materials 28 Oktyabr 2006 14:20 (UTC +04:00)

Avropa Şurasının Venesiya Komissiyası oktyabrın 13-14-də təşkilatın 68-ci sessiyasında qəbul olunmuş Azərbaycanda "Sərbəst toplaşmaq azadlığı haqqında" qanuna dair rəyini açıqlayıb. Bu barədə Trend ə komissiya katibi Kerolain Qodard məlumat verib. Rəy Venesiya Komissiyasının bu məsələ üzrə məruzəçiləri Boqdan Auresku (Rumıniya), Finola Flanaqan (İrlandiya) və Piter Pakzolayın (Macarıstan) şərhləri əsasında qəbul olunub.

Rəydə qeyd olunub ki, 5 may 2006-cı ildə Azərbaycan prezidenti İcra Aparatının başçısı 1998-ci ilin noyabr ayında qəbul olunmuş Azərbaycanda "Sərbəst toplaşmaq azadlığı haqqında" qanunun qiymətləndirilməsi üçün Venesiya Komissiyasına müraciət edib, sonra isə ATƏT-in təşəbbüsü ilə sentyabrın 19-da Bakıda qanunun əməli istifadəsinə həsr olunmuş "dəyirmi masa" keçirilib. ATƏT, Venesiya Komissiyası və Azərbaycan höküməti nümayəndələrinin iştirak etdiyi bu görüş zamanı yığılmış informasiya əsasında hüquqi rəy qəbul olunub.

Venesiya Komissiyasının ekspertləri belə bir fikrə gəliblər ki, sərbəst toplaşmaq azadlığının əsas prinsiplərinin Azərbaycanın Konstitusiyası və digər qanunvericilik aktlarında əks olunması faktını müsbət hesab etmək olar. Lakin, onların fikrincə, qanunda sərbəst toplaşmaq azadlığının konstitusiya hüquqlarına nəzarət üzrə, xüsusilə də onun həyata keçirilməsi üzrə ictimai asayişi pozmayan, dövlətin müdaxiləsini zəruri etməyən bəndlərə aid müddəalarda artıq təfərrüatlar var. "Müvafiq qaydalar daha çox icazə verilmiş məsələlərə deyil, qadağan olunmuş məsələlərə aid olmalıdır: aydın olmalıdır ki, qadağan olunmayan hər şeyə icazə verilir, lakin əksinə yox. Ona görə də qanunun məntiqi dəyişdirilməlidir", - beynəlxalq ekspertlər belə hesab edir.

Bundan əlavə, Venesiya Komissiyası hesab edir ki, qanun məhdudlaşdırma üçün icazə verilmiş səbəblərə uyğun olmayan dərəcədə toplaşmaq kateqoriyaları arasında artıq fərq müəyyən edir; mütənasiblik prinsiplərinə kifayət dərəcədə riayət olunmur; qanun təhlükəsizliyin təmin olunması üçün dövlətin müdaxilə etmə faktını qeyri-adekvat surətdə əks etdirir və s.

Venesiya Komissiyası qanunun mətninin təkmilləşdirilməsində Azərbaycan hökümətinə yardım etməyə hazır olduğunu bildirib.

Azərbaycanın rəsmi şəxsləri beynəlxalq ekspertlərin bu qanun üzrə gəldikləri nəticə barədə hələ Trend ə heç bir şərh verməyib.

Xəbər lenti

Xəbər lenti