Azərbaycan, Bakı, 10 may / Trend /
SOCAR (Azərbaycan Respublikası Dövlət Neft Şirkəti) 2010-cu ilin qaz anbarlarına qazın vurulması mövsümünədək (aprelin ortaları) "Qaradağ" yeraltı qaz anbarının fəal həcminin artırılması üzrə birinci fazanı başa çatdıracaq. Birinci faza çərçivəsində anbara qaz vurulması həcmi hazırkı 500 milyon kubmetrdən 1,4 milyard kubmetrədək artırılacaq. Bu barədə "Azəriqaz" QSC-nin rəhbəri Əlixan Məlikov bildirib.
Bunun üçün qaz anbarında qazkompressor stansiyası inşa ediləcək.
Qaz anbarının gücünün artırılmasının ikinci fazası çərçivəsində onun tutum həcminin 2,4 mlrd. kubmetrədək artırılması planlaşdırılır.
Azərbaycanda ümumilikdə iki yeraltı qaz anbarı var. İkincisi "Kalmaz"dır. Bu yeraltı qaz anbarının fəal gücü 1,1 mlrd. kubmetrdir.
2008-2009-cu illərin payız-qış dövrlərində istifadə üçün ötən il Azərbaycanın yeraltı qaz anbarlarına ümumilikdə 1,4 mlrd. kubmetr qaz vurulub. Bu həcmin bir hissəsi 2008-2009-cu illərin payız-qış mövsümündə abunəçilərin təmin edilməsi üçün istifadə olunub.
Məqalə müəllifi ilə əlaqə ünvanı: [email protected]
