Azərbaycan, Bakı, 29 oktyabr/ Trend /
ARDNŞ-nin törəmə müəssisəsi olan SOCAR Georgia Gas Gürcüstanın Zestafoni rayonunda yeni qaz kəmərinin tikintisini başa çatdıraraq istismara verib. Bu barədə ARDNŞ-nin məlumatında deyilir.
Ötən il dekabrın 26-da ARDNŞ və Gürcüstan hökuməti 30 qazpaylayıcı təsərrüfat və qazpaylayıcı şəbəkənin istifadəyə verilməsi barədə müqavilə imzalayıb. Bu şəbəkələr Gürcüstanın Kaxeti, Msxeta-Mtianeti, Şida və Kvemo-Kartli, Acarıstan, Quriya, İmereti, Sameqrelo kimi regionlarını əhatə edir. Bu şəbəkələr 24 şirkət tərəfindən istismar edilib.
Apreldə SOCAR Energy Georgia şirkəti həmçinin Gürcüstanın azərbaycanlıların yığcam şəkildə yaşadığı Marneuli rayonunun qazpaylayıcı şəbəkəsini də istifadəyə alıb.
Üçillik investisiya proqramı çərçivəsində bu şəbəkə istehlakçılarının sayını 60 min nəfərdən 150 min nəfərədək artırmaq planlaşdırılır. Birinci il çərçivəsində 57 min yeni potensial istehlakçı üçün 800 kilometrə yaxın ümumi uzunluğa malik qazpaylayıcı şəbəkə tikiləcək. Birinci investisiya ili çərçivəsində qazpaylayıcı şəbəkələrin inkişafına 28,6 milyon dollar vəsait yatırılıb.
