Çinin CNEEC şirkətinin dəvəti ilə azərbaycanlı energetiklərdən ibarət qrup bu ölkəyə səfər edəcək. Səfər çərçivəsində energetiklər şirkətin məhsulları və zavodları ilə tanış olacaq. Trend in xəbər verdiyi kimi, bu barədə "Azərenerji" SC-nin mətbuat xidmətindən məlumat verilib. Azərbaycanlı mütəxəssislər Harbin şəhərindəki boru avadanlıqları istehsal edən zavoda baş çəkəcək. Şirkət bu avadanlıqlardan Mingəçevir YES-də blokların inşası zamanı istifadə etməyi təklif edir.
Bundan başqa, "Azərenerji" nümayəndələri sovet mütəxəssisləri tərəfindən inşa edilmiş elektrik stansiyalarının yenidənqurulması və modernləşdirilməsi ilə tanış olacaq. Proqramın bu bəndi çərçivəsində SC nümayəndələri Pekin, Şenjen şəhərlərinə baş çəkəcək. Əli Bayramlıda yeni elektrik stansiyasının inşası planlarını nəzərə alaraq, şirkətin qaz-mazutla işləyən elektrik stansiyalarından ibarət məhsulları da azərbaycanlı mütəxəssislərdə böyük maraq doğurur.
Çin şirkəti Azərbaycan YES-in 7 enerji blokunun yenidən qurulması üzrə ilin sonunadək keçiriləcək tenderdə iştirak etmək niyyətindədir. Hazırda CNEEC Xaçmazda yarımstansiyanın inşası layihəsində iştirak edir.
