Azərbaycan, Bakı, 06 noyabr / Trend , müxbir H.Vəliyev /
"Xalq Kompyuteri" pilot layihəsinin birinci mərhələsi başa çatıb və yaxın günlərdə onun gələcəkdə də həyata keçirilməsi məsələsinin nəzərdən keçirilməsi gözlənilir, bu barədə Trend -a Rabitə və İnformasiya Texnologiyaları Nazirliyinin İnformasiya cəmiyyətinin inkişafı şöbəsinin müdiri Rüfət Gülməmmədov bildirib.
Gülməmmədovun sözlərinə əsasən, "Xalq Kompyuteri" ilk pilot layihəsi çərçivəsində 3500-dən çox personal kompyuter satılıb ki, onun da böyük əksəriyyətini (təxminən 90 faiz) portativ kompyuterlər təşkil edib.
"Xalq Kompyuteri" pilot layihəsi aprel ayında başlayıb. Layihə çərçivəsində beş min mini-nout (MiniNote), noutbuk və masaüstü kompyuterlər ayrılıb.
"Xalq Kompyuteri" pilot layihəsi çərçivəsində təklif edilən kompyuterlər müəllimlər üçün nəzərdə tutulub və 12 ay müddətinə bazar qiymətindən 25-40 faiz aşağı qiymətə, faizsiz kreditlə satılıb.
Layihə HP və Microsoft şirkətlərinin iştirakı ilə həyata keçirilib. Texnikanın tədarükü HP şirkətinin yerli tərəfdaşı Best Comp Group şirkəti tərəfindən həyata keçirilib.
Layihə çərçivəsində elektron kommersiya sistemi fəaliyyətə başlayıb ki, bu da İnternet resursu http://www.xalqkomp.az/. vasitəsilə kompyuter almağa imkan verib.
Məqalə müəllifi ilə əlaqə ünvanı: [email protected]