Azərbaycan, Bakı, 11 yanvar / Trend, müxbir H.Vəliyev /
Texnoparklar və regional innovasiya zonaları (RİZ) "BakuTel-2013" 19-cu Beynəlxalq telekommunikasiyalar və informasiya texnologiyaları sərgisində müzakirə olunan mövzulardan biri olacaq. Bu barədə cümə günü Trend-ə Rabitə və İnformasiya Texnologiyaları Nazirliyindən bildirilib.
Bununla əlaqədar nazirliyin dəstəyi ilə təşkil ediləcək sərgi çərçivəsində irimiqyaslı konfransın keçiriləcəyi gözlənilir ki, tədbirdə innovasiya zonalarının formalaşdırılması məsələlərinə baxılacaq.
Bu il "BakuTel" sərgisi əvvəl elan edilən vaxtdan tez, yəni sentyabrın 25-28-də keçiriləcək. Azərbaycanın milli stendi çərçivəsində İKT sahəsində layihələri respublikanın dövlət strukturları təmsil edəcəklər.
Respublikada RİZ-lərin yaradılması İT sənayesinin inkişafının prioritet istiqaməti kimi müəyyən edilib. Layihə kiçik və orta innovasiya sahibkarlığının inkişafı üçün sənaye zonalarının, istehsal və elektron avadanlığın və proqram təminatının ixracı üzrə regional bazanın yaradılmasını, ölkənin səmərəli tranzit informasiya mərkəzinə çevrilməsini, formalaşdırılan informasiya cəmiyyəti üçün insan resurslarının hazırlanması və inkişafını, müxtəlif sahələrdə informasiya texnologiyalarının tətbiqini nəzərdə tutur.