Azərbaycan, Bakı, 21 yanvar / "Trend müxbir D.Xatınoğlu/ İranda martda keçirilməsi planlaşdırılan növbəti parlament seçkilərində islahatçı qüvvələrin nümayəndələrinin səlahiyyətinin təsdiq olunmaması, saxtakarlığın göstəricisidir. "Iranda Parlament seçkilərinin sağlam keçiriləcəyinə heç bir ümid yoxdur" - deyə, İran politoloqu Əhməd Zeydabadi "Trendə" bildirb.
Martın 15-də İranda növbəti parlament seçkiləri keçiriləcək. İranın sabiq prezidenti Məhəmməd Xatəmi (Mohammad Khatami) islahatçı qüvvələrin nümayəndələrinin əksəriyyətinin səlahiyyətlərinin rədd olunmasına narahtlığını bildirib. "Nehzət-Azadi" partiyasının baş katibi İbrahim Yəzdi (Ebrahim Yazdi) isə, xarici müşahidəçilərin seçkilərə nəzarətinin vacibliyini vurğulayıb. İrna Agentliyinin yanvarın 20-də yaydığı məlumata əsasən, İran Seçkilər Fondunun sədri Əlirza Əfşar bildirib ki, bəzi nümayəndələrin səlahiyyətlərinin rədd olunması qanun çərçivəsində olub və heç bir narahatlığa səbəb olmamalıdır. İranın dini rəhbəri Əli Xamenei (Ali Khamenei) isə, beynəlxalq müşahidəçilərin ölkəyə çağırılmasını "həyasızlıq və utanmazlıq"adlandırıb.
Zeydabadi bazar ertəsi Tehrandan telefonla bildirib ki, növbəti seçkilərin demokratik keçirilməsi inandırıcı deyil. "İslahatçı və demokrat namizədlərin çoxuna səlahiyyət verilməyib və hakimiyyət yalnız öz istədiyi şəxslərə bu seçkiyə qatılmağa icazə verib. Məncə, beynəlxalq müşahidəçilərin seçkilərə nəzarəti vacibdir, yoxsa, həm namizədlərin, həm də xalqın seçkilərdən imtina etməsi istisna olunmur"-deyə, Zeydabadi bildirib.
Digər İran politoloqu İsa Səhərxiz (İsa Saharkhiz) isə, bu gün Tehrandan telefonla Trend ə bildirib ki, Xamenei İranın daxili və xarici siyasətini birbaşa müəyyənləşdirməyə çalışır, bu isə, diktaturanın göstəricisidir. "İran milləti və bəzi islahatçı namizədlər son ultimatum olaraq, seçkilərdən imtina edəcək"-deyə, Səhərxiz hesab edir.
