Azərbaycan, Bakı, 29 iyul/ Trend , müxbir E.Babayev/ Azərbaycanda yeni siyasi partiyanın yaradılması istiqamətində aparılan fəaliyyətə müvəqqəti olaraq fasilə verilib. "Hazırda Təşkilat Komitəsinin üzvlərinin bir hissəsi Bakıda olmadığından, prosesə müvəqqəti fasilə vermişik", - bunu çərşənbə axşamı Trend -a yeni partiyanın yaranması məqsədilə formalaşan 11 nəfərdən ibarət Təşkilat Komitəsinin üzvü Aydın Quliyev deyib.
Trend -un arayışı: Quliyev Azərbaycanın eks-spikeri Rəsul Quliyevin rəhbərlik etdiyi müxalifətçi Azərbaycan Demokrat Partiyasında təmsil olunub, katib, Ali Məclis üzvü olub. Ötən ilin əvvəlində Quliyev və tərəfdarları ADP-dən ayrılaraq, Açıq Cəmiyyət Partiyasını (ACP) yaradıblar. Quliyev ACP-nin lideri Quliyevin müşaviri olub, ötən ilin sentyabrında bu vəzifəsindən və partiyadan istefa verib.
Quliyev deyib ki, indi əsas müzakirələr yeni partiyanın adının nədən ibarət olması istiqamətində gedir. "Əsasən, 3 ad üzərində dayanmışıq. Təşkilat Komitəsinin üzvləri Bakıda olmadığından, bu müzakirələrə fasilə vermişik. Yəqin avqust ayının sonlarında müzakirələr yenidən başlayacaq və partiyanın adı müəyyənləşdiriləcək" - deyən Quliyevin sözlərinə görə, partiyanın oktyabrın 15 - də Azərbaycanda keçiriləcək prezident seçkisinədək elan olunması nəzərdə tutulur. "Ola bilər ki, partiyanın elan olunması seçkidən sonraya qala da bilər. Bu, işin gedişindən asılı olacaq" - deyə o əlavə edib.
Məqalə müəllifi ilə əlaqə ünvanı: [email protected]
