...

Taliban qiyamçıları Kabilin giriş qapılarına yaxınlaşıblar – Əfqanıstan Senatının katibi

Siyasət Materials 3 Sentyabr 2008 17:31 (UTC +04:00)

Əfqanıstan, Kabil, 03 sentyabr / Trend , A.Həkimi / Koalisiya qüvvələrinin Kabilin Hudxil məntəqəsində keçirdiyi əməliyyat Əfqanıstan Senatı tərəfindən ciddi tənqid olunub.

Əfqanıstan Senatının ikinci katibi Əbülxaliq Hüseyni çərşənbə günü Senatın ümumi iclasında bildirib ki, koalisiya qüvvələrinin son əməliyyatları nəticəsində Taliban qiyamçıları Kabilin giriş qapılarına yaxınlaşıblar və indi onların şəhərin təhlükəsizliyinin təmin edilməsi işini yerli qüvvələrə təhvil verməsi şəhərin Taliban tərəfindən işğal olunmasını istəmələri deməkdir.

"Ölkədə günahsız insanların öldürülməsi davam edir, koalisiya qüvvələrinə qarşı ümumxalq hərəkat olmasa, onlar dinc sakinləri öldürməkdən əl çəkməyəcəklər", - deyə Hüseyni Trend -un müxbirinə Kabildə bildirib.

Senat nümayəndələri iki gün öncə Kabilin Hudxil məntəqəsində koalisiya qüvvələri tərəfindən aparılan əməliyyat nəticəsində iki uşağın həlak olması faktını kəskin tənqid ediblər. Senat nümayəndəsi Mirbet Xan bildirib ki, Əfqanıstanın Milli Şurası və hökuməti tərəfindən dəfələrlə tələb olunmasına baxmayaraq, koalisiya qüvvələri dinc sakinlərə qarşı amansız hərəkətlərini davam etdirərlər. Koalisiya qüvvələri əksər hallarda milli polis qüvvələri ilə razılaşdırmadan əməliyyatlar həyata keçirir ki, bu da dinc sakinlər arasında ölüm faktlarını artırır.

"Koalisiya qüvvələri bütün əməliyyatları özbaşına təşkil edir və Əfqanıstan dövləti ilə hesablaşmır", - deyə Mirbet Xan bildirib.

Senatın ikinci katibi Hüseyni bildirib ki, koalisiya qüvvələrinin Əfqanıstandakı bütün hərəkətləri qanunsuzdur. "Dinc sakinlərin ölümü ilə bağlı faktları araşdırmaq üçün xüsusi komissiya yaradılmalıdır", - deyə Hüseyni təklif edib.

NATO qüvvələrinin mətbuat xidmətindən verilən məlumatda isə bildirilib ki, Hudxil əməliyyatında koalisiya qüvvələri iştirak etməyib. "NATO qüvvələri adıçəkilən əməliyyatda iştirak etməyib", - deyə məlumatda bildirilib. Məlumatda həmçinin qeyd olunub ki, aparılan araşdırmalardan sonra məlum olub ki, koalisiya qüvvələrinin bu əməliyyatda heç bir rolu olmayıb.

Senatorlar koalisiya qüvvələrinin Əfqanıstanda fəaliyyətinin qanun çərçivəsində olmasını istəyiblər. Çərşənbə axşamı Senatda keçirilin iclas zamanı senatorlar ölkə prezidenti ilə dinc sakinlərin öldürülməsi, koalisiya qüvvələrinin özbaşına əməliyyatları barədə müzakirələr aparıblar.

"Koalisiya qüvvələrinin fəaliyyətinin qanuniləşdirilməsi üçün prezident Kərzaiyə vaxt verilməlidir, prezident koalisiya qüvvələrinin Əfqanıstandakı fəaliyyətinin qanuniləşdiriləcəyi barədə söz verib", - deyə senator Məhəmməd Elm İzəd Trend -un müxbirinə Kabildə bildirib.

O əlavə edib ki, hazırda prezident üç gücü özündə birləşdirməklə (ədliyyə, qanunvericilik və icraedici) xalq qarşısında götürdüyü öhdəlikləri yerinə yetirməlidir.

Herat vilayətinin Şendend şəhərində aparılmış qanlı əməliyyta qarşı tənqidlər davam etdiyi bir vaxtda Hudxildə keçirilmiş əməliyyat tənqidləri daha da gücləndirib.

BMT-nin araşdırmalarına əsasən, Herat vilayətinin Şendend vilayətində keçirilən əməliyyat nəticəsində 90 nəfərdən çox dinc sakin həlak olub. BMT Əfqanıstanda dinc sakinlərin həlak olmasından narahatlığını ifadə edib.

ABŞ qüvvələri öz növbəsində bu hadisəni belə şərh ediblər ki, Şenden şəhərində 30 Taliban qiyamçısının öldürülməsi ilə nəticələnən əməliyyat zamanı onlar Taliban komandirlərindən birini izləyərkən Şendenin Əzizabad kəndinə çatıblar. Onlar arasında atışma baş verən zaman ABŞ qüvvələri hərbi hava hücumundan istifadə etməyə məcbur qalıblar.

Herat vilayətinin Şenden şəhərində baş vermiş hadisə ilə bağlı isə müxtəlif fikirlər səslənməkdədir. Şenden hadisəsini araşdırmaq üçün BMT, ABŞ qüvvələri və Əfqanıstan hökuməti nümayəndələrindən ibarət müştərək komissiya yaradılıb.

Əfqanıstanın insan haqları üzrə komissiyası bildirib ki, Şenden şəhərində həlak olmuş 90 dinc sakin arasında qadın və uşaqlar da var. Komissiya ölkədə keçirilən əməliyyatlar zamanı ərazilərin bombalanmamasını və əməliyyatların bütün təhlükəsizlik qüvvələri ilə razılaşdırılaraq keçirilməsini tələb edib.

İnsan haqları üzrə komissiya rəsmisi bildirib ki, Şendendə baş verən hadisələrlə bağlı məruzə hazırlayaraq Əfqanıstan prezidenti Kərzaiyə təqdim etmək niyyətindədirlər.

Əfqanıstanda keçirilən əməliyyatlar zamanı dinc sakinlərin ölüm faktlarının artması koalisiya qüvvələri ilə Əfqanıstan hökuməti arasında gərginliyə səbəb olub.

Ekspertlərin fikrincə, Taliban qiyamçıları evlərdə və bağlarda gizlənərək hücumlar həyata keçirdiyindən onlara qarşı əməliyyatlar zamanı çox sayda dinc sakin həlak olur. Həmçinin, Taliban qiyamçıları əhalinin məskunlaşdığı yerlərdə gizli sığınacaqlar qurduğundan, bu da dinc sakinlər arasında ölüm hallarının artmasına səbəb olur.

Müəlliflə əlaqə saxlamaq üçün elektron ünvan [email protected]

Xəbər lenti

Xəbər lenti