Azərbaycan, Bakı, 10 fevral / Trend , müxbir A.Hüseynbala / Azərbaycanda referendumla bağlı proseslər başa çatandan sonra müxalifətin daimi fəaliyyət göstərən koordinasiya mərkəzinin yaradılması ehtimalı böyükdür.
"Həmin mərkəzin formatı referendumla bağlı yaradılan hərəkatın formatı ilə üst-üstə düşməyə də bilər", - çərşənbə axşamı Trend -a bir qrup müxalif partiya və ictimai təşkilatın təsis etdiyi "Qarabağ və Respublika Uğrunda Hərəkat"da təmsil olunan "Azərbaycan Naminə" İctimai Forumun rəhbəri Eldar Namazov bildirib.
Trend - un arayışı: Azərbaycanda 2008-ci ilin oktyabr ayında keçirilən prezident seçkisindən sonra prezident seçkisinin nəticələrini tanımayan Müxalifətin Əməkdaşlıq Mərkəzində təmsil olunan Müsavat və Azərbaycan Xalq Cəbhəsi partiyaları müxalifətin gələcək əməkdaşlığını nəzərdə tutan layihələr hazırlayıblar.
Seçkidən sonra müxalifətin daha geniş koalisiyada birləşməsi istiqamətində danışıqlar başlasa da, qarşılıqlı ittihamlar nəticəsində hələki müxalifətin geniş koalisiyasının yaranması baş tutmur.
Müxalifətin Əməkdaşlıq Mərkəzinə "Azadlıq" bloku (Azərbaycan Xalq Cəbhəsi, Liberal, Vətəndaş və İnkişaf partiyaları), Müsavat Partiyası və "Azərbaycan Naminə" İctimai Forum (ANİF) daxildir.
Namazovun sözlərinə görə, müxalifət daxilində müəyyən inteqrasiya prosesi artıq başlayıb. "Düşünürəm ki, bu prosesin müsbət nəticəsi də olacaq", - Forum rəhbəri əlavə edib.
ANİF rəhbərinin müxalifətin referendumdan sonrakı əməkdaşlığı ilə bağlı öz təklifləri də var: "Nəzərdə tutduğum variantları indi açıqlamaq istəmirəm. Çünki referendumla bağlı proseslər başa çatmadan yeni təkliflə çıxış etmək səmərəsiz olardı".
"Azərbaycanın müxalif qüvvələrinin referendumdan sonrakı birgə fəaliyyəti siyasi situasiyadan asılı olacaq", - çərşənbə axşamı Trend -a "Qarabağ və Respublika Uğrunda Hərəkat"da təmsil olunan Azərbaycan Demokrat Partiaysının (ADP) sədri Sərdar Cəlaloğlu bildirib.
Onun fikrincə, referendumla bağlı təsis olunan təşviqat qruplarının indiki birgə əməkdaşlığı müxalifətin gələcək addımları üçün də bir stimul ola bilərdi.
"Müxalifətin gələcək seçkilərdə bir mövqedən çıxış etməsi üçün indidən hansısa müzakirələrin aparılmasına ciddi ehtiyac var. Bu əməkdaşlığı kimlərsə arzulamaya bilər. Amma bir neçə aparıcı müxalifət partiyasının bir mərkəzdə birləşməsi qaçılmazdır", - ADP sədri əlavə edib.
Məqalə müəllifi ilə əlaqə ünvanı:[email protected]