Azərbaycan, Bakı, 29 may / Trend , müxbir K.Zərbalıyeva /
Azərbaycanda son üç il yarım ərzində vətəndaşlarla kobud rəftar etdiklərinə, onların hüquq və azadlıqlarını pozduqlarına görə 565 polis əməkdaşı cəzalandırılıb, Trend -un məlumatına görə, bu barədə bazar ertəsi daxili işlər naziri Ramil Usubov ATƏT-in Bakı Ofisinin yeni təyin olunmuş rəhbəri, səfir Bilge Cankorel ilə görüşündə deyib.
Nazir bildirib ki, 1997-2007-ci illər ərzində BMT, Avropa Şurası və ATƏT tərəfindən Bakı şəhərində təşkil olunmuş ən müxtəlif mövzuları əhatə edən 50-dən çox seminarda daxili işlər orqanlarının 2000-ə yaxın əməkdaşı iştirak edib.
ATƏT-in Bakı Ofisi ilə əməkdaşlıq çərçivəsində 2006-ci ilin iyun ayından etibarən Mingəçevir şəhər Polis Şöbəsi beynəlxalq polis ekspertlərinin iştirakı ilə "Cəmiyyət dəstəkli polis" adlı layihə həyata keçirilir.
"Cəmiyyət dəstəkli polis" layihəsinin 2008-ci ildən başlayaraq Şirvan şəhərində həyata keçirilməsi, eləcə də Mingəçevir şəhərində davam etdirilməsi ATƏT-in Bakı Ofisi ilə razılaşdırılıb.
Polislə ictimaiyyət arasında əlaqələrin genişləndirilməsinə xidmət edən bu tipli layihələrin respublikanın 8 şəhər-rayon polis şöbələrində həyata keçirilməsinə başlanılıb.
Nazir kriminogen durumla bağlı səfirə məlumat verib.
Cankorel ATƏT-lə Daxili İşlər Nazirliyi arasında qarşılıqlı faydalı işbirliyinin bütün sahələrdə praktik nəticə və səmərə verdiyini, uğurlu əməkdaşlığın gündən-günə inkişaf etdiyini və daha da dərinləşdiyini, təmsil etdiyi qurumun polis fəaliyyətinin təkmilləşdirilməsində hər zaman maraqlı olduğunu, bu prosesə bundan sonra da yardımçı olacağını vurğulayıb.
Məqalə müəllifi ilə əlaqə ünvanı: [email protected]