...

Ermənistan Azərbaycana qarşı ərazi iddialarından əl çəkməsə, daha rəzil vəziyyətə düşəcək - Deputat

Siyasət Materials 15 Avqust 2022 12:09 (UTC +04:00)
Ermənistan Azərbaycana qarşı ərazi iddialarından əl çəkməsə, daha rəzil vəziyyətə düşəcək - Deputat

Bakı. Trend:

Ermənistan Azərbaycana qarşı ərazi iddialarından əl çəkməli və regionda sülhün bərqərar olması üçün əməkdaşlıq etməlidir. Bunun əksi Ermənistana heç bir fayda gətirməyəcək. Ermənistan Azərbaycana qarşı ərazi iddialarından əl çəkməsə daha rəzil vəziyyətə düşəcək.

Bunu Trend-ə Milli Məclisin deputatı Afət Həsənova deyib.

Deputat bildirib ki, Ermənistan Azərbaycana qarşı ərazi iddialarını davam etdirəcəksə, Azərbaycanın da Ermənistanın ərazi bütövlüyünü şübhə altına almağa tam əsası olacaq.
“Bunun üçün siyasi, tarixi, hüquqi və digər əsaslar var. Bu gün Ermənistanın yerləşdiyi ərazi son qarışına qədər Azərbaycanın tarixi torpaqlarıdır. Ermənilər bizim torpaqlara 180-200 il bundan əvvəl məqsədyönlü şəkildə köçürülüblər, indiki Ermənistan ərazisi tarixi Azərbaycan torpaqlarıdır. Ermənilərin burada 1918-ci ilə qədər heç vaxt dövlətləri olmayıb. Bizim dövlətçilik tariximiz isə 5000 ildir.

Ermənilərin Azərbaycan ərazilərinə və bütövlükdə Cənubi Qafqaza gəlmə olduğu, 1918-ci ilə qədər bu ərazidə ermənilərin dövlət qurumunun olmaması tarixçilər tərəfindən dəfələrlə sübuta yetirilib. Bu fikri Azərbaycan Prezidenti İlham Əliyev də ən yüksək tribunalardan səsləndirib. Azərbaycan tarixçilərinin ortaya çıxardığı dəlillər də indiki Ermənistan ərazisinin tarixi Azərbaycan torpaqları olduğunu sübut edir.

1918-ci ildə Cənubi Qafqazda ilk erməni dövləti yarandıqdan sonra İrəvan şəhəri Ermənistanın paytaxtına çevrilib və sonradan Yerevan adlandırılıb. İrəvan şəhəri və onun ətrafındakı toponimlərin mütləq əksəriyyətinin Azərbaycan türkcəsində olması bir daha onu göstərir ki, bu ərazi azərbaycanlıların qədim yaşayış məskənlərindən olmuşdur.
Azərbaycanlılar min illər boyu dədə-baba yurdları olan İrəvanda, Qərbi Zəngəzurda, Göyçə mahalında, Vedibasarda, ümumiyyətlə, hazırda Ermənistanın qurulduğu, mövcud olduğu ərazilərdə yaşayıblar”, - deyə deputat bildirib.

A.Həsənova bildirib ki, tarixin müxtəlif vaxtlarında azərbaycanlılar etnik mənsubiyyətinə görə Qərbi Azərbaycan - indiki Ermənistan ərazisindən kütləvi şəkildə deportasiya olunub.

“Ermənilərin 1828-ci ildən başlanmış azərbaycanlıların qovulub çıxarılması prosesi 1988-ci ildə başa çatdırıldı. Həmin il azərbaycanlıların axırıncı sakinləri erməni millətçiləri tərəfindən doğma şəhər və kəndlərindən deportasiya edildi. Bu tale həm də min illər boyu yaranmış coğrafi adların – toponimlərin tam genosidi ilə başa çatdı. Azərbaycanlı əhali qovulduqca onun kəndləri dağıdılır və beləliklə, onların adları məhv edilirdi.

Qərbi Azərbaycan – indiki Ermənistan ərazisində xalqımızın çox zəngin mədəni-tarixi irsi var. Bu da təsadüfi deyil, çünki əcdadlarımız minillər boyu bu ərazidə yaşayıblar. Bu gün də mədəni-tarixi irsimiz ermənilər tərəfindən dağıdılır, yer üzündən silinir. Ermənilər çoxlu sayda nadir Azərbaycan memarlıq və tarixi abidələrini mənimsəyiblər və ya vəhşicəsinə dağıdıblar! XVII əsrə aid Xan Sərdar sarayı, XVIII əsrə aid Abbas Mirzə məscidi, XIX əsrə aid Həsənəli bəyin hamamı, Səlim, Talin, Əfşar karvansaraları və digər çoxlu sayda mədəni-tarixi irsimiz erməni vandalları tərəfindən məhv edilib”, - deyə deputat əlavə edib.
A.Həsənova vurğulayıb ki, ermənilərin tarixi saxtalaşdıraraq Azərbaycana qarşı ərazi iddiaları ilə çıxış etmə cəhdləri yalnız onların ziyanına olacaq. “Bu gün sosial-iqtisadi böhran içərisində çabalayan Ermənistanın yeganə yolu Azərbaycanın 44 günlük vətən müharibəsi nəticəsində yaratdığı yeni reallıqları qəbul etməkdir.

Ermənistan 30 il ərzində Azərbaycana qarşı işğalçılıq siyasəti nəticəsində dalan bir ölkəyə çevrilib, dərin sosial-iqtisadi və siyasi böhran içərisindədir. Bu gün heç kim, heç bir ölkə Ermənistana kömək edə bilmir. Ermənistanın yeganə çıxış yolu Azərbaycanın yaratdığı yeni reallıqları qəbul edərək əməkdaşlıq etməkdir, əks halda bundan sonra da dalan ölkə olaraq qalacaq və daha rəzil vəziyyətə düşəcək”, - deyə deputat əlavə edib.

Məqalədə:
Xəbər lenti

Xəbər lenti