Şuşa. Trend:
Bu ilin sonunadək Xocavəndə 53 ailənin köçürülməsi planlaşdırılır.
Trend xəbər verir ki, bunu Azərbaycan Respublikası Prezidentinin Ağdam, Füzuli və Xocavənd rayonlarında xüsusi nümayəndəsi Emin Hüseynov "Sahibkarlar üçün yeni imkanlar: Qarabağı birlikdə quraq" adlı tədbirdə deyib.
"Bu gün böyük dəyişikliklərin və tarixi torpaqlarımızın bərpasının astanasındayıq. Qarabağ uzun illər ərzində işğaldan sonra yenidən ümumi evimizin bir hissəsinə çevrilir. Füzuli, Ağdam və bir çox digər rayonların tədricən necə canlandığını görürük.
İnsanlar öz evlərinə qayıdır, məktəblərin və digər ictimai obyektlərin tikintisi başlayır. Misal üçün, Füzulidə artıq 3132-dən çox insan yaşayır, 450 şagird isə Özbəkistanın bizə hədiyyə etdiyi yeni məktəbdə təhsil alır", - o deyib.
E.Hüseynov yenidənqurma işlərinin həm Azərbaycan dövləti, həm də beynəlxalq tərəfdaşların dəstəyi ilə aparıldığını qeyd edib.
(Tərcümə: Rəna Əbdürəhmanova)