"Biz Moskvada Azərbaycan Sosial Demokrat Partiyasının həmsədri (ASDP) eks-prezident Ayaz Mütəllibovla səmərəli görüş keçirib seçki ilə bağlı bir sıra məsələləri müzakirə etdik". Bu barədə Trend agentliyinə ASDP-nin digər həmsədri Araz Əlizadə bildirib.
A.Əlizadə onu da bildirib ki, görüşdə onunla birgə eks-prezidentin vəkili Fuad Ağayev də iştirak edib: "Eks-prezidentin məlum məhkəmə ilə bağlı işi müzakirə edilib. Ancaq belə qərara almışıq ki, müzakirə olunan məsələlər media üçün hələlik açıqlanmasın".
A.Əlizadə Azərbaycanda seçkiqabağı vəziyyətin A.Mütəllibov tərəfindən necə qiymətləndirilməsini belə izah edib: "Nə qədər ki, siyasi mühacirlərin, xüsusilə də Ayaz Mütəllibovun Azərbaycana qayıdıb seçkilərdə iştirak etməsinə şərait yaratmırlar, o seçki demokratik keçirilməyəcək".