Azərbaycan, Bakı, 15 dekabr / Trend , müxbir H.Bağırov/
Azərbaycanda qəsdən adam öldürməkdə və xuliqanlıqda təqsirli bilinən şəxslərin məhkəməsi keçirilib.
Trend -un məlumatına görə, çərşənbə axşamı Ağır Cinayətlərə Dair İşlər üzrə Məhkəmədə keçirilən prosesdə çıxış edən dövlət ittihamçısı təqsirləndirilən şəxslər - Əfqan Mirzəyevin 15, Bağır Məmmədovun 3, Kamran Mirzəyev, Mehrac Mirzəyev, Abdulla Ağayev, İsmayıl Cabbarov, Ramin Ramazanov, Çingiz Hüseynovun hər birinin 2 il müddətinə azadlıqdan məhrum edilməsini məhkəmədən xahiş edib.
Məhkəmə dekabrın 24-də hökm elan edəcək.
Bu il iyunun 3-də Sabunçu rayonunda Xaşaxuna bağında daş satışı ilə məşğul olan Əfqan Mirzəyev və Tərlan Cəfərov arasında daşda əskiklik olması ilə bağlı mübahisə yaranıb.
Daha sonra davaya çevrilən münaqişə iki qrup arasında bıçaqlaşma ilə nəticələnib. Hadisə zamanı 26 yaşlı Tərlan Cəfərov və qardaşı 24 yaşlı Musa bıçaqla öldürülüb.
Təqsirləndirilən şəxslər Cinayət Məcəlləsinin 120.2.1-ci (qəsdən adam öldürmə - qabaqcadan əlbir olan bir qrup şəxs və ya mütəşəkkil dəstə tərəfindən törədildikdə) və 120.2.7-ci (iki və daha çox şəxsi öldürmə), 221-ci (xuliqanlıq) maddələri ilə ittiham olunurlar.
Məqalə müəllifi ilə əlaqə ünvanı: [email protected]
