Bakı. Trend:
UEFA Avropa Liqasında mübarizəsini dayandıran Azərbaycan kubokunun qalibi “Sabah” komandası UEFA Konfrans Liqasının II təsnifat mərhələsində Moldovanın “Petrokub” klubu ilə qarşılaşacaq.
Trend xəbər verir ki, ilk oyun iyulun 24-də səfərdə, cavab matçı isə bir həftə sonra Bakıda keçiriləcək.
“Petrokub” turnirin I təsnifat mərhələsində Malta təmsilçisi “Birkirkara” üzərində 0:1 (səfərdə məğlubiyyət), 3:0 (evdə qələbə) nəticəsi ilə üstünlük qazanıb.
Qeyd edək ki, “Sabah” UEFA Avropa Liqasının I təsnifat mərhələsində Sloveniyanın “Selye” komandası ilə qarşılaşmada 2:3 və 3:3 hesabları ilə məğlub olaraq turnirlə vidalaşıb.