Azərbaycan, Bakı, 13 avqust / Trend , müxbir N.İsmayılova /
"Bakıda Almaniya Texniki Əməkdaşlıq Cəmiyyətinin (GTZ) Özəl Sektorun İnkişafı Proqramı çərçivəsində yaradılmış Azərbaycan Tekstil və Hazır Geyim Assosiasiyasının (AZTEX) təqdimat mərasimi keçirilib", - GTZ-nin cümə axşamı yayılan məlumatında deyilir.
Təqdimat mərasimində Azərbaycanın tekstil və hazır geyim müəssisələrini təmsil edən 25 nümayəndə iştirak edib. Onlar AZTEX-in məqsədləri, strategiyası və öz üzvlərinə göstərəcəyi xidmətlər haqqında məlumat əldə ediblər. Tekstil bazarının iştirakçıları bu assosiasiyanın yaradılması və fəaliyyətinin başlanmasını dəstəkləyib.
Təqdimat mərasimində AZTEX-in prezidenti Nəsimi Dadaşov assosiasiyanın məqsədləri haqqında danışıb. Onun sözlərinə görə bura daxildir: üzvlərin bütün biznes tələbləri və fəaliyyətləri, milli və beynəlxalq biznes əlaqələrinin qurulması və inkişafı zamanı dəstəklənməsi və üzvlərin digər təşkilat və qurumlarda təmsil olunması. O, həmçinin tekstil və hazır geyim istehsalı ilə məşğul olan şirkətlər üçün bazar və bu sənaye sahəsi haqqında məlumatların ötürülməsi, seminar və treninqlərin keçirilməsi, fərdi məsləhət xidmətinin göstərilməsi, beynəlxalq əlaqələrin qurulması və ya beynəlxalq tədbirlərdə iştirak üçün lazımi dəstəyin göstərilməsi kimi AZTEX tərəfindən təklif olunan mümkün xidmət və fəaliyyətlər haqqında məlumat verib.
AZTEX-in təqdimat mərasimi, həmçinin GTZ-in adından tekstil və hazır geyim sektoru üzrə çalışan mütəxəssislər tərəfindən dəstəklənib. İştirakçılara beynəlxalq tekstil və hazır geyim bazarında mövcud olan aktual bazar və marketinq meyilləri, AZTEX və Azərbaycandan olan şirkətlər üçün inkişaf imkanları haqqında məlumat verilib. Mütəxəssislər ən yaxşı təcrübəyə əsaslanan və uğurlu fəaliyyət göstərən beynəlxalq tekstil və hazır geyim assosiasiyalarının strukturu və xidmətləri haqqında çıxış edib.
"Tekstil və hazır qeyim bazarında mövcud olan yüksək və artmaqda davam edən beynəlxalq rəqabəti nəzərə alsaq, peşəkar bir assosiasiya Azərbaycan şirkətləri üçün olduqca əhəmiyyətlidir. AZTEX gələcəkdə özünün üzv şirkətlərinin biznesini dəstəkləyəcəkdir", - deyə mütəxəssislərdən biri bildirib.
ASPI Consulting Engineers-in qiymətləndirmələrinə görə, bu sektorun ümumi maliyyə tələbatı 200 milyon manatdır. Bu məbləğ təkmilləşdirmə, istehsalın planlaşdırılması sisteminin tətbiqi, inkişaf strategiyasının hazırlanması, regional bazarlara çıxış, sərmayələrin cəlbi və beynəlxalq hesabatlılıqdan istifadə olunması və keyfiyyətin idarə olunması üçün lazımdır.
Bununla yanaşı, nəinki texniki cəhətdən geriqalma, həmçinin keyfiyyətə nəzarət, məhsulun planlaşdırılması və istehsalın səlis idarə olunması sisteminin yoxluğu üzə çıxarılıb. Məhsulun xalis dəyərinin 30-40 faizini təşkil edən enerji xərcləri rəqabət qabiliyyətinə problemlər yaradır. Kadr problemləri də var ki, bu da texnologiyaların yenilənməsinə mane olur. Menecmentin ekstensiv sistemi isə istehsala xüsusi xərclərin bahalaşmasına gətirib çıxarır.
Azərbaycanda 36 özəlləşdirilmiş tikiş və əyirmə müəssisəsi fəaliyyət göstərir.
Avqustun 13-nə olan rəsmi məzənnə 0,804 AZN/USD təşkil edir.
Məqalə müəllifi ilə əlaqə ünvanı: [email protected]
