Azərbaycan, Bakı, 15 mart /Trend, müxbir E.İsmayılov/
"Azərbaycan Hava Yolları" QSC Bakı-Amsterdam-Bakı və Bakı-Aberdin-Bakı marşrutları üzrə birbaşa aviareyslər açır. Bu barədə çərşənbə axşamı QSC-dən bildiriblər.
Məlumata görə, Bakı-Amsterdam-Bakı marşruru üzrə aviareys mayın 24-də açılacaq. Reyslər çərşənbə axşamı və cümə günləri həyata keçiriləcək. Təyyarə Bakıdan yerli vaxtla saat 08:50-də uçacaq.
Uçuşun gediş-gəliş dəyəri 456 manat təşkil edir.
QSC-dən bildiriblər ki, mayın 22-dən Bakı-Aberdin-Bakı marşrutu açılır. Aviareys çərşənbə və bazar günləri həyata keçiriləcək. Təyyarə Bakıdan yerli vaxtla saat 07:40-da uçacaq.
Uçuşun gediş-gəliş dəyəri 651 manat təşkil edir.