...

Azərbaycanın dövlət büdcəsinin profisiti 1,8 dəfə artıb

Biznes və iqtisadiyyat xəbərləri Materials 7 Aprel 2012 13:10 (UTC +04:00)

Azərbaycan, Bakı, 7 aprel /Trend, müxbir Ə.Həsənov/

2012-ci ilin yanvar-fevral aylarında Azərbaycanın dövlət büdcəsinin mədaxil hissəsinə faktiki daxilolmalar ötən ilin analoji dövrü ilə müqayisədə 35,3 faiz artaraq 2475 milyon manat (ÜDM-in 30,9 faizi) təşkil edib. Bu barədə şənbə günü Trend-ə hökumətdən bildirilib.

Dövlət büdcəsinin xərcləri 8,5 faiz artaraq 1286,7 milyon manat (ÜDM-in 16,1 faizi) təşkil edib. 2012-ci ilin yanvar-fevral aylarında dövlət büdcənin profisiti 1188,3 milyon manat səviyyəsində olub ki, bu da ÜDM-in 14,9 faizini təşkil edib. 2011-ci ilin analoji dövrünə nisbətən dövlət büdcəsinin profisiti 1,8 dəfə artıb.

Daxilolmalar strukturunda 42,3 faiz (1047,5 milyon manat) Vergilər Nazirliyinin hesabına təmin edilib. Gömrük rüsumları və vergilərindən 156,1 milyon manat (6,3 faizlik xüsusi çəki) daxil olub, digər mənbələrin hesabına gələn gəlir isə 1271,4 milyon manat (51,4 faiz) təşkil edib.

Hesabat dövrü ərzində ƏDV-dən 369,1 milyon manat gəlir daxil olub ki, bu da ümumi gəlirin 14,9 faizini təşkil edir. Mənfəət vergisi 414,5 milyon manat (16,7 faiz), gəlir vergisi 119,8 milyon manat (4,8 faiz), aksiz vergisi 78,9 milyon manat (3,2 faiz), əmlak vergisi 19,1 milyon manat (0,8 faiz), torpaq vergisi 5,4 milyon manat (0,2 faiz), yeraltı sərvətlər vergisi 20,9 milyon manat (0,8 faiz), xarici iqtisadi fəaliyyətə görə vergi isə 102,9 milyon manat (4,2 faiz) təşkil edib.

Əhalinin sosial müdafiəsi və təminatına dövlət büdcəsindən yanvar-fevral aylarında 343,6 milyon manat (26,7 faizlik xüsusi çəki) xərclənib. Təhsilə 132,8 milyon manat (10,3 faiz), səhiyyəyə 41,5 milyon manat (3,2 faiz), prokurorluq, təhlükəsizlik, hüquq-mühafizə orqanlarının, məhkəmə hakimiyyətinin saxlanılmasına 96,6 milyon manat (7,5 faiz), iqtisadiyyata investisiya qoyuluşuna isə 278,7 milyon manat (21,7 faiz) xərclənib.

Qoyulan kapitalın ümumi həcminin 199,2 milyon manatı (0,3 faiz) sənaye, tikinti sahələrinə və faydalı qazıntılara, 18,3 milyon manat (1,4 faiz) mənzil-kommunal xərclərə, 21,4 milyon manat (1,7 faiz) kənd, meşə təsərrüfatı və balıqçılığa, 7,2 milyon manat isə (0,6 faiz) nəqliyyat və rabitəyə yönəldilib.

Dövlət xərclərinin 51 faizi (656,2 milyon manat) əhalinin əməkhaqqı, pensiyalar və müavinətlərə görə ödənişlərinə xərclənib.

Xəbər lenti

Xəbər lenti