Azərbaycan, Bakı, 17 may /Trend, müxbir Ə.Həsənov/
Yanvar-aprel ayları üzrə kənd təsərrüfatının ümumi məhsulunun faktiki qiymətlərlə dəyəri 712 milyon manat təşkil edib və keçən ilin eyni dövrünə nisbətən 4,5 faiz, o cümlədən bitkiçilik məhsulları istehsalı 9,5 faiz, heyvandarlıq məhsulları istehsalı 4,3 faiz artıb. Trend-in məlumatına görə, bu barədə Dövlət Statistika Komitəsinin yaydığı məlumatda deyilir.
Ölkədə yazlıq bitkilərin kütləvi əkini davam edir. May ayının 1-nə olan vəziyyətə 263,7 hektar sahədə yazlıq bitkilər, o cümlədən 40,5 min hektarda dənli və dənli paxlalı bitkilər, 5,6 min hektarda kartof, 51 min hektarda tərəvəz bitkiləri, 23,7 min hektarda pambıq, 18,7 min hektarda ərzaq üçün bostan bitkiləri, 3,3 min hektarda şəkər çuğunduru, 6,3 min hektarda dən üçün günəbaxan, 59,3 min hektarda çoxillik otlar əkilib.
Yazlıq əkinlərin strukturunda yazlıq dənli və dənli paxlalılar (qarğıdalı daxil olmaqla) 15,4 faiz, texniki bitkilər 12,9 faiz, kartof, tərəvəz və bostan bitkiləri 47,7 faiz, yem bitkiləri 23,3 faiz təşkil edib.
Təsərrüfatlarda 36,4 min ton tərəvəz məhsulları istehsal edilib.
Yanvar-aprel aylarında respublikada diri çəkidə 137,7 min ton mal-qara və quş əti, 527,4 min ton süd, 384,6 milyon ədəd yumurta, 1866 ton yun istehsal edilib. Keçən ilin eyni dövrü ilə müqayisədə ət istehsalı 3,5 faiz, süd istehsalı 4 faiz, yumurta istehsalı 11,9 faiz, yun istehsalı isə 26,3 faiz artıb.
Balıqçılıqla məşğul olan təsərrüfatlarda ovlanmış balıq və göstərilmiş xidmətlərin dəyəri 66,6 min manat olub.
