Azərbaycan, Bakı, 8 aprel /Trend/
Bakı şəhərinin içməli su təchizatında xüsusi əhəmiyyəti olan, bir əsrə yaxın tarixə malik, "Şollar" adı ilə məşhurlaşmış birinci Bakı su kəmərinin ideya müəllifi və layihə rəhbəri Uilyam Linldey nəslinin nümayəndələri Azərbaycana gəliblər.
"Azərsu" ASC-nin mətbuat xidmətindən Trend-ə verilən məlumata görə, bu gün U.Lindley nəslinin nümayəndələri Karin Maria Marta, Eugen Jozef, Katerina Morvin, Aleksandr Horst, həmçinin Polşa Elmlər Akademiyasının siyasi araşdırmalar üzrə Elmi Tədqiqat İnstitutunun direktoru, U.Lindley irsini araşdıran professor Riçard Zeliçovski ASC-də olublar.
Qonaqları salamlayan "Azərsu" ASC-nin sədri Qorxmaz Hüseynov bildirib ki, məşhur mühəndis U.Lindleyin Azərbaycanın su təchizatı tarixində böyük xidmətləri var. U.Lindleyin müəllifi olduğu birinci Bakı su kəməri artıq 100 ilə yaxın bir dövrdə istismar olunur və Bakı sakinlərinin içməli su təchizatına töhfələr verməkdədir: "Əsasən əl əməyi hesabına tikilən kəmər yüksək keyfiyyəti ilə seçilir. Bu kəmər indiyədək sabit məhsuldarlıqla davamlı olaraq istismar edilib və demək olar ki, əsaslı təmirə ehtiyacı olmayıb. Belə bir unikal layihənin reallaşması Uilyam Lindleyin dövrünün peşəkar mütəxəssisi olduğunu bir daha təsdiqləyir. Hazırda Azərbaycanda genişmiqyaslı su təchizatı və kanalizasiya layihələri həyata keçirilir. Layihələrin keyfiyyətli icrasını təmin etmək üçün podratçı təşkilatlara "Şollar" layihəsini həmişə nümunə göstəririk. 2017-ci ildə kəmərin istismara verilməsinin 100 ili tamam olacaq və yubiley tədbirlərində sizləri yenidən Azərbaycanda görməkdən məmnun olardıq".
Lindleylər ailəsi adından təşəkkürlərini bildirən E.Jozef ulu babasının xatirəsinə göstərilən ehtiramı yüksək qiymətləndirib, bu səfərin onlarda xoş təəssürat yaratdığını qeyd edib.
1853-cü ildə anadan olmuş ingilis mühəndis və inşaatçısı U.Lindley həyatını şəhərlərin su təchizatının yaradılmasına həsr edib. Onun adı Avropanın 30-dan çox şəhərinin (Frankfurt, Varşava, Praqa, Budapeşt və s.), o cümlədən Bakının su təchizatı tarixinə qızıl hərflərlə yazılıb.
Qeyd edək ki, 19-cu əsrin sonlarında Bakının su təchizatında yaranmış problemlərlə əlaqədar Şəhər Dumasının razılığı ilə su kəmərinin layihələndirilməsi üçün mütəxəssislər dəvət edilib. Bu dəvəti müsbət dəyərləndirən ingilis mühəndisi U.Lindley yeraltı suların öyrənilməsi üzrə axtarışlar aparıb. U.Lindleyin layihəsi əsasında çəkilmiş birinci Bakı su kəməri mənbəyini Bakıdan 187 km məsafədə - Xaçmaz rayonunun Şollar kəndindəki yeraltı sulardan götürür. "Şollar" mənbəyi 24 artezian quyusundan, eləcə də lay və bulaq sularından qidalanır. "Şollar" su kəmərinin tikintisinə XX əsrin əvvəllərində başlanılıb və "Şollar" suyu 1917-ci ildə Bakı əhalisinə çatdırılıb. Həmin il fevralın 18-i tarixə "Bakı-Şollar" su kəmərinin açılışı günü kimi düşüb.
Məşhur xeyriyyəçi Hacı Zeynalabdin Tağıyevin maliyyə dəstəyi ilə çəkilən kəmər 100 ilə yaxındır ki, Bakı əhalisini su ilə təmin edir. 1917-ci ildən fasiləsiz fəaliyyət göstərən bu mənbənin məhsuldarlığı demək olar ki, dəyişməyib. "Şollar" ilin bütün dövründə orta hesabla saniyədə 1270 litr su verir.
