Oktyabr ayında Azərbaycan banklarının depozit bazası 2,35% artıb. Cari ildə isə bu artım 26,4% təşkil edib. Azərbaycan Milli Bankından Trend ə verilən məlumata görə, noyabrın 1-i üçün hüquqi və fiziki şəxslərin bank depoziti və əmanətlərinin həcmi 2005-ci il oktyabrın 1-nə olan 6331,9 mlrd manata və yanvarın 1-nə olan 5126,3 mlrd manata qarşı 6480,5 mlrd manat təşkil edib. Bu həcmin 1137,4 milyardı manatın, 5343,1 mlrd manatı isə valyutanın payına düşüb. Ötən ay ərzində manat depozitləri 3,4% azalıb, valyuta depozitləri isə 3,65% artıb.
Oktyabr ayı ərzində fiziki şəxslərin əmanətləri 0,39%, hüquqi şəxslərin əmanət və depozitləri isə 3,45% artıb. İlin əvvəlindən fərdi müştərilərin depozitləri 13,42%, korporativ müştərilərin depozitləri isə 34,83% artıb.
Noyabrın 1-i üçün fiziki şəxslər tərəfindən ölkə banklarına qoyulmuş əmanətlər 2286,3 mlrd manata qədər artıb. Hüquqi şəxslərin depozitlərinin həcmi isə 4194,2 mlrd manat təşkil edib.
Noyabrın 1-i üçün hüquqi şəxslərin milli valyutada bank depozitləri üzrə orta dərəcə 6,65% olub. B göstərici 2005-ci il oktyabrın 1-də 6,56%, yanvarın 1-də isə 5,89% təşkil edib. Korporativ müştərinin AKV-də bank depoziti üzrə orta dərəcə 7,73% təşkil edib. Bu göstərici 2005-ci il oktyabrın 1-də 7,46%, yanvarın 1-də isə 5,58% olub.
Noyabrın 1-i üçün fiziki şəxslərin milli valyutada bank depoziti üzrə orta dərəcə 2005-ci il oktyabrın 1-nə olan 10,19%-ə və yanvarın 1-nə olan 9,61%-ə qarşı 10,36% təşkil edib. Real dərəcə isə 7,39%-ə bərabər olub. Fərdi müştərinin AKV-də bank depoziti üzrə orta dərəcə 2005-ci il oktyabrın 1-nə olan 10,62%-ə və yanvarın 1-nə olan 10,53%-ə qarşı 10,66% təşkil edib.