Azərbaycan, Bakı, 29 sentyabr / Trend , müxbir E.İsmayılov/
Oktyabr ayında ARDNŞ "Bulla Dəniz-82" platformasından yeni yüksəkdebitli kəşfiyyat qaz-kondensat quyusunun qazılmasını planlaşdırır. Bu barədə çərşənbə axşamı ARDNŞ-dən bildirilib.
Yeni kəşfiyyat quyusunun ehtimal olunan sutkalıq debiti təxminən 500 min kubmetr qaz və 80 ton qaz-kondensat təşkil edir.
"Bir müddət əvvəl bu quyunun qazılmasına başlanılmışdı, amma başa çatdırılmamışdı. Təxminən 1200 metr qazılıb. Hazırda bu dərinlikdə kənar sütunların qoyulması işləri keçirilir. Qazma işləri oktyabr ayında başlayacaq", - mənbə bildirib.
Mənbənin əvvəlcədən bildirdiyi kimi, quyunun dərinliyini 6400 metrə çatdırmaq planlaşdırılır. Yeni quyunun qazılmasını bu yaxınlarda ARDNŞ-nin "Kompleks Qazma İşləri" tresti yanında yaradılan "Sahil" qazma işləri idarəsi həyata keçirəcək.
Əvvəlcə ARDNŞ-nin məlumatında deyildiyi kimi, yataqdan sutkada 450 min kubmetr qaz hasil edilir. ARDNŞ geoloqlarının fikrincə, bu yataqda qaz hasilatını bir neçə dəfə artırmaq olar.
Azərbaycanda 57 neft qaz yatağı mövcuddur, onlardan 18-i dənizdə, qalanları isə quruda yerləşir. ARDNŞ əməkdaşlarının ştatı hazırda 62 min nəfər təşkil edir.
Məqalə müəllifi ilə əlaqə ünvanı: [email protected]
