Azərbaycan, Bakı, 21 sentyabr /Trend, müxbir E.İsmayılov/
ITGI qaz kəməri (Türkiyə-Yunanıstan-İtaliya) layihəsi üzrə investisiya qərarı ilin sonuna qədər qəbul oluna bilər. Trend-in məlumatına görə, bunu çərşənbə günü Bakıda Gas Infrastructura World Caspian 2011" adlı III beynəlxalq konfransda İtaliyanın "Edison" şirkətinin Türkiyə nümayəndəliyinin rəhbəri Akın Özkan deyib.
Özkanın sözlərinə görə, layihənin regiondakı digər gaz layihələrindən bir sıra üstünlükləri var, o cümlədən Gürcüstan, Türkiyə və Yunanıstanın mövcud infrastrukturundan istifadəni nəzərdə tutur.
Onun fikrincə, boru kəmərinin gücü ildə 17 milyard kubmetrə çata bilər, bunun 12 milyard kubmetri Qərbi Avropa bazarına, qalan 5 milyardı isə Şərqi Avropa bazarına tədarük edilə bilər.
Şərqi Avropaya qaz tədarükü IGB (Yunanıstan-Bolqarıstan interkonnektoru) qaz kəmərinin işə salınması ilə mümkün ola bilər ki, bu kəmər 2012-ci ilin sonunda işə başlaya bilər.
ITGI qaz boru kəməri "Cənub qaz dəhlizi"nin birinci mərhələsi ola bilər və Xəzərin Azərbaycan hissəsində "Şahdəniz" qaz-kondensat yatağının işlənməsinin ikinci mərhələsində qaz hasilatının başlanğıcınadək istismara verilməsi ehtimal olunan qaz boru kəmərləri arasında yeganədir.
