Azərbaycan, Bakı / Trend / Azərbaycan Dövlət Neft Şirkətinin (ARDNŞ) Geologiya və Geofizika İdarəsi "Cənubi-Qərb Qobustan"ın "Sahilyanı" blokunda 3D tipli seysmik kəşfiyyatı başa çatdırıb. Bu barədə "Arawak Energy" şirkətinin yaydığı məlumatda bildirilir. Qeyd edək ki, "Cənubi-Qərb Qobustan" "Gobustan Operating Company" tərəfindən işlənilir.
"Sahilyanı" bloka "Daşgil", "Duvannı" və "Kənizadağ" daxildir. Kəşfiyyat işləri 200 kv.m-lik ərazini əhatə edib.
ARDNŞ-lə imzalanan PSA tipli müqavilə əsasında "Cənubi-Qərb Qobustan"ın işlənməsi ilə "GOC" əməliyyat şirkəti məşğuldur. "Gobustan Operating Company"də iştirakın 80 faizi "Commonwealth Gobustan Limited" şirkətinə, 20 faizi isə ARDNŞ-ə məxsusdur. Öz növbəsində "Commonwealth Gobustan Limited"də 37,17 faizə "Arawak Energy", 62,83 faizə isə "China National Petroleum Company" şirkətlər qrupu malikdir.
Verilən xəbərə görə, hazırda 2D tipli seysmik kəşfiyyat "Mərkəzi" və "Şimal" bloklarında davam etdirilir. İşlər 480 kv.m-lik ərazini əhatə edir.
Subpodratçı rolunda Rusiyanın "Tyumenneftgeofizika" şirkəti çıxış edir.
