Azərbaycan, Bakı, 6 aprel /Trend, müxbir H.Vəliyev/
Mayın əvvəlindən Azərbaycanın Təhsil Nazirliyi orta təhsil müəssisələrində kompüterləşdirilmənin növbəti mərhələsinə başlayacaq. Bunu çərşənbə axşamı Azərbaycan Təhsil Nazirliyinin təhsilin informasiyalaşdırılması şöbəsinin müdiri Samir Məmmədov deyib.
Məmmədovun sözlərinə görə, hazırda internet şəbəkəyə qoşulmaq üçün kompüter və şəbəkə avadanlığının alınmasından ötrü nazirlik tərəfindən bəzi tenderlərin keçirilməsi planlaşdırılır ki, bu da İKT ilə təchiz olunmuş məktəblərin sayını xeyli artıracaq.
"Bu il biz rayon mərkəzlərində yerləşən orta təhsil müəssisələrini də əhatə etmək niyyətindəyik, belə ki, həmin məktəblər də internet şəbəkəsinə qoşulacaq", - Məmmədov deyib.
Nazirliyin statistikasına görə, Azərbaycanda 20 şagirdə bir kompüter düşür. Bu göstərici beş il bundan əvvəl qeydə alınmış göstəricini 60 dəfə üstələyir. O zaman hər 1036 şagirdə cəmi bir kompüter düşürdü.
Bundan əvvəl təhsil naziri Misir Mərdanovun dediyi kimi, bu il məktəblərin kompüterləşdirilməsinə 16 milyon manat sərf ediləcək. Həmin vəsaitin xeyli hissəsi 500 məktəbin yüksəksürətli internet şəbəkəsinə qoşulması və müəllimlər üçün treninqlərin keçirilməsi üçün ayrılacaq.
İşlər 2008-2012-ci illərdə Azərbaycanın təhsil sisteminin informasiyalaşdırılması üzrə Dövlət Proqramı çərçivəsində həyata keçirilir.
Layihədə əsas məqsəd İT-dən istifadə olunmaqla təhsilin keyfiyyətinin artırılması üçün vahid təhsil informasiya mühitinin yaradılması və ölkənin dünya təhsil sisteminə inteqrasiyasıdır. Bu, ilk növbədə, ölkənin təhsil sisteminin səmərəli idarə olunmasına, həmçinin qlobal şəbəkə vasitəsilə xarici ölkələrin təhsil müəssisələri ilə əlaqə saxlamağa imkan verəcək.
