Azərbaycan, Bakı, 29 dekabr /Trend, müxbir H.Vəliyev/
Kommutasiya edilən Dial-up Azərbaycanın internet bazarında minimum daha 7 il üstünlük təşkil edəcək. Bu barədə çərşənbə günü "Delta Telecom" şirkətinin texniki direktoru Rahid Ələkbərli deyib.
Ələkbərlinin sözlərinə görə, bunu ölkədə ümumi internet istifadəçilərinin sayının 12 faizini təşkil edən genişzolaqlı internetin indiki inkişaf dinamikası bariz nümayiş etdirir.
"Bu dinamikanı, daha dəqiq desək, 2010-cu ildə bizim genişzolaqlı internetin nüfuz səviyyəsinin 12 faizinə nail olmağımızı nəzərə alsaq, bizə kommutasiya edilən Dial-up-ın bazarı tam tərk etməsi üçün azı 7 il lazım olacaq. Bu gün istifadəçilərin yarısından çoxu şəbəkəyə Dial-up texnologiyası üzrə daxil olurlar, halbuki əksər inkişaf etmiş və inkişaf etməkdə olan ölkələrdə o, sadəcə olaraq provayderlərin göstərdikləri xidmətlər sırasından çıxarılıb. Bu, göstərilən internet xidmətlərinin keyfiyyətində problemlərin olmasından xəbər verir", - Ələkbərli qeyd edib.
"Delta Telecom"un texniki direktorunun sözlərinə görə, ciddi maarifləndirmə işinin aparılmasına ehtiyac duyulur.
"Bu gün Azərbaycanda həyata keçirilməsi həm internet oyunçuları, həm də son nəticədə xidmətlərin bu növünün inkişafında mühüm rol oynayan istehlakçılar tərəfindən kompleks yanaşmanı və kollektiv dəstəyi tələb edən genişzolaqlı internetin inkişaf konsepsiyası hazırlanır, belə ki, şəbəkəyə hansı üsulla çıxmaq seçimi onlara məxsusdur. Sözsüz ki, genişzolaqlı internetin inkişafında iqtisadi, bazar və texniki faktor da mühüm rol oynayır. Bu konsepsiyaya kompleks yanaşmadan danışsaq, burada söhbət istifadəçilər arasında maarfləndirmə işinin aparılmasının zəruriliyindən də gedir. Yəni izah etmək lazımdır ki, genişzolaqlının qiymətinə başa gələcək məbləğə Dial-up-ın skretç-kartlarını dəfələrlə almaq əvəzinə, meqabit kanalı 20 manata almaq daha asandır. Bundan başqa, Dial-up multimedia kontentindən, sosial şəbəkələrdən və s. keyfiyyətli istifadə etməyə imkan vermir", - Ələkbərli qeyd edib.
Genişzolaqlı istifadənin indiki tariflərinə toxunan "Delta Telecom"un mütəxəssisi onları başqa ölkələrlə müqayisədə əsaslı adlandırıb. Onun sözlərinə görə, bu gün ilk növbədə provayderlərin göstərdikləri xidmətlərin keyfiyyətinə diqqət yetirmək lazımdır.
"2010-cu ildə istehlak bazarında kifayət qədər fəallıq müşahidə edilib və artım qeydə alınıb, buna bu istiqamətdə aparılan qiymət siyasəti xidmət edib. Belə ki, il ərzində internet-servis provayderlərin əlavə tutum üçün aldıqları tariflər 110 manatdan 50 manata endirilib. Və bu, kanalların tutumunun daha çox genişləndirilməsi üçün zəmin yaradıb", - Ələkbərli vurğulayıb.
Bu gün provayder magistral xəttin texniki təkmilləşdirilməsi üzrə işlər aparır, bu, bilavasitə məlumatların ötürülməsi sürətinə də təsir göstərəcək. Ələkbərlinin qeyd etdiyi kimi, bu istiqamətdə aparılan işlər nəticəsində Azərbaycanın internet magistralı regionda ən etibarlı magistrala çevriləcək.
Bu il Azərbaycanın ilk provayderi "Delta Telecom" şirkəti Azərbaycana daxil olan trafikin həcmini 3 Gbit/s-dən çox artıraraq 35 Gbit/s-ə çatdırıb. "Delta Telecom" sistemi Stokholmdakı dünyanın ən böyük internet-trafik mübadiləsi nöqtəsi ilə birbaşa birləşib ki, bu da "Delta Telecom"un Azərbaycan operatorları üçün IP-trafikin xidmətlərindən istifadə üzrə effektiv operator kimi statusunu möhkəmlədir.
"Delta Telecom" şirkətinin trafiki İran, Rusiya və Türkiyə əraziləri vasitəsilə optik xətlər üzrə daxil olur. DWDM (Dense Wavelength Division Multiplexing) nəqliyyat texnologiyasından istifadə etməklə respublika daxilində məlumatların ötürülmə sürəti 40 Gbit/s-ə çatıb.
Yüksəksürətli şəbəkə infrastrukturunun olması "Delta Telecom"a qonşu ölkələrlə trafik axınını həyata keçirməyə imkan verir. Trafikin müəyyən hissəsi Özbəkistan və Türkmənistana satılır.
"Delta Telecom"un şəbəkə infrastrukturu tranzit rolunu oynayaraq, Rusiya və İranın, Rusiya və Türkmənistanın telekommunikasiya infrastrukturlarının birləşdirir.
Trafikin tranzitinə kanalın buraxılış qabiliyyətinin 10 faizindən (1,25 Gbit/s) çoxu cəlb edilib. Ümumilikdə "Delta Telecom" şirkətinin infrastrukturu buraxılış qabiliyyətini 10 Gbit/s-dək genişləndirməyə imkan verir.