Azərbaycan, Bakı, 1 sentyabr /Trend, müxbir H.Vəliyev/
Azərbaycanın KÜR kompüter avadanlıqları istehsalçısı Türkiyənin "NSH Technology Systems" şirkəti ilə əməkdaşlıq haqqında saziş imzalayıb. Bu barədə Trend-ə cümə axşamı KÜR-dən bildirilib.
Hazırda KÜR NSH Technology Systems-ə təqdim olunan və məlumatları uzaq məsafədən 54 Mbit/saniyə sürətlə ötürə bilən radioavadanlıqların sınağını keçirir. Sınaq Mingəçevir şəhərində avtomat telefon stansiyası ilə KÜR zavodu arasında yerləşdiriləcək. ATS-dən zavodadək marşrutun uzunluğu təxminən 3,5 kilometr təşkil edir. Sınaqlar radioavadanlıqların sabit işlədiyini göstərib.
Sınaqdan keçirilən avadanlığın üstünlüyü həm də daha geniş müdafiə və əhatə zonasına malik simsiz Wi-Fi avadanlıqlarının yerləşdirilməsinin mümkünlüyüdür.
KÜR-dən deyildiyi kimi, qurğunun demo variantının Bakutel-2011 sərgisi çərçivəsində təqdim olunması planlaşdırır, satışa isə ilin sonunda çıxarılacaq.
