Azərbaycan, Bakı, 19 dekabr /Trend, müxbir Hüseyn Vəliyev/
Belarus peyk rabitəsi sahəsində Azərbaycanla əməkdaşlıq etməyə hazırdır.
Trend-in Azərbaycanın Rabitə və Yüksək Texnologiyalar Nazirliyinə istinadən verdiyi məlumata görə, qeyd edilən sahədə iki ölkənin əməkdaşlıq məsələlərinin 2015-ci ilin I rübündə Minskdə keçiriləcək Azərbaycan-Belarus iqtisadi əməkdaşlıq üzrə hökumətlərarası komissiyasının növbəti iclası çərçivəsində müzakirə edilməsi nəzərdə tutulur.
İclas çərçivəsində sahə nazirlərinin görüşü baş tutacaq. Onlar yüksək texnologiyalar sahəsində Azərbaycan-Belarus əməkdaşlığı məsələlərinə toxunacaqlar.
Belarus tərəfi peyk rabitəsi sahəsində Azərbaycanla əməkdaşlıqda maraqlıdır. Xüsusilə, iki ölkə birgə elmi araşdırmaların aparılması üçün aşağıorbitli peyklərdən istifadə imkanlarını nəzərdən keçirir.