Azərbaycanda maliyyə xidmətlərinin inkişafı layihəsinin rəhbəri, Dünya bankının mütəxəssisi Sonya Brayoviç-Bratonoviç Bakıdadır. Rabitə və informasiya nazirliyindən Trend ə verilən məlumata görə, səfərdə məqsəd maliyyə xidmətlərinin göstərilməsi üçün Azərbaycanın poçt sisteminin təkmilləşdirilməsi layihəsinin həyata keçirilməsinin gedişi ilə tanış olmaqdır.
Mütəxəssisin səfəri fevralın 14-dək davam edəcək.
Nazirlikdən o da bildirilib ki, 2007-ci ildən etibarən Azərpoçt DM-in müəssisə və bölmələri tərəfindən maliyyə və bank xidmətləri göstəriləcək. Bunun üçün Azərpoçt müvafiq lisenziya almalıdır, yalnız bundan sonra o, milli ödəmə sisteminə qoşulacaq.
Layihə çərçivəsində görülmüş tədbirlər nəticəsində 1000 yeni iş yerinin açılması nəzərdə tutulur.
Layihə 2005-2008-ci illərdə Azərbay canda rabitə və telekommunikasiya sisteminin inkişafı üzrə dövlət proqramı çərçivəsində həyata keçirilir. 3 il ərzində reallaşdırılacaq layihənin dəyəri $17,5 milyondur. Bu məqsədlə DB $12,25 mln ayıracaq, yerdə qalan məbləğ isə ölkə hökumətinin payına düşür.
