Azərbaycan, Bakı /müx. Trend S.Babayeva / Parisin yüksək instansiyalı məhkəməsi Maltanın
"FIMbank"ına qarşı məhkəmə prosesində Azərbaycanın xeyrinə qərar qəbul edib. Cümə günü Azərbaycan Rabitə və İnformasiya Texnologiyaları Nazirliyindən verilən məlumata görə, qərar Azərbaycan tərəfinin Rabitə Nazirliyinin "Eutelsat S.A" tərəfindən yatırılmış və məhkəmə tərəfindən 6,5 mln. avro dəyərində qiymətləndirilən vəsaitlərinin və onların dividendlərinin girov qismində saxlanılması tədbirlərinin təxirə salınmasına dair iddiası barədə çıxarılıb. Məhkəmənin qərarı ilə girov təxirə salınıb.
Maltanın "FIMbank" şirkəti Azərbaycandan ümumi məbləği 4,5 mln. dollar olan kreditin ödənilməsini tələb edir və bank iddia edir ki, kredit dövlət təminatı ilə Azərbaycanın iki kommunikasiya şirkətinə verilib. Azərbaycan tərəfi isə iddia edir ki, bu şirkətlər heç zaman mövcud olmayıb və onlara təminat təqdim olunmayıb. "FIMbank"ın birinci iddiası 2004-cü ilin iyul ayında Rotterdam və Paris məhkəmələrinə edilib.