Bakı. Trend:
İsveç hökuməti ağır cinayətlərə qarşı ictimai münasibəti sərtləşdirmək məqsədilə şərti azadlığa buraxılma şərtlərini dəyişdirməyə hazırlaşır.
Trend xəbər verir ki, yeni təşəbbüsə əsasən, məhkumların vaxtından əvvəl azadlığa çıxmaq üçün cəzanın azı dörddə üçünü çəkmələri tələb olunacaq. Bu, hazırkı üçdə iki qaydasından daha sərt yanaşma deməkdir.
Ədliyyə naziri Gunnar Strömmer bu təklifin əsas məqsədinin cəmiyyətin təhlükəsizliyini təmin etmək olduğunu bildirib: “Təşəbbüs cəmiyyətin ağır cinayətlərə münasibətini sərtləşdirmək məqsədi daşıyır”.
Yeni qaydaların ilk mərhələsi yalnız altı il və daha artıq müddətə azadlıqdan məhrum edilmiş şəxslərə şamil olunacaq. Eyni zamanda, zorakı cinayətlərə görə ən azı dörd il və ya mütəşəkkil cinayətə görə iki il cəza alan, eyni zamanda təkrar cinayət törətmə riski yüksək olan şəxslərin şərti azadlığa buraxılması imkanının təxirə salınması təklif olunur.
Hökumət əlavə olaraq 2026-cı il martın 1-dən etibarən ardıcıl və təhlükəli cinayətkarlar üçün müddətsiz təhlükəsizlik tədbirlərinin tətbiqini planlaşdırır. Bu tədbirlərin hər il təxminən 45 nəfərə şamil olunacağı gözlənilir.
Bununla belə, əvvəlki hökumət komissiyası bu cür islahatların reabilitasiya prosesinə mənfi təsir göstərə biləcəyini və təxminən 7 milyard İsveç kronu (təxminən 650 milyon dollar) əlavə xərclərə səbəb olacağını qeyd edərək, ehtiyatlı yanaşmağı tövsiyə etmişdi.